ანი დვალიშვილი, ალია
„ქართულ ოცნებაში“ მომხდარი გადაადგილება ოპოზიციისთვისაც შოკისმომგვრელი იყო. ისინი ვერც კი წარმოიდგენდნენ, რომ ასეთი რამ მოხდებოდა და 15 მაისის აქციისთვის ემზადებოდნენ. უფრო სწორედ, ეს აქცია ნაციონალურ მოძრაობას „შეეტენა“ და მთავარი ოპოზიციური ძალა მის „გამოძრობას“ ჯიუტად ცდილობს. თუ 15 მაისამდე ციხიდან ნიკა მელიას არ გამოუშვებენ, ნაციონალები ქუჩაში ხალხის გამოყვანას ვერ მოახერხებენ და ამიტომ, სურთ პასუხისმგებლობა სხვა პარტიებთან ერთად აიღონ.
„პარლამენტში შესული პარტიები აქციაზე გასვლას აღარ აპირებენ. მიზეზი მარტივია – რა უნდა უთხრან ამომრჩეველს, პარლამენტში ვართ, მაგრამ მაინც ვაპროტესტებთო? გარეთ რეალურად თაკო ჩარკვიანი, ლეიბორისტები და ნაციონალები დარჩნენ. ეს სამეული კი 10 ათასი კაცის მოგროვებასაც ვერ მოახერხებს და როგორც მმართველი გუნდის, ისე დანარჩენი ოპოზიციის დასაცინი გახდებიან. ამიტომ, ნაცმო ძალიან ცდილობს, 15 მაისის აქციაზე სხვა პარტიების დაითანხმოს და თუ ხალხი ვერ მოგროვდება (და ვერ მოგროვდება), ოპოზიცია ერთმანეთისკენ ხელის გაშვერას არ დაიწყებს და ნაცებს არავინ დააყვედრის, პარლამენტში რომ არ შეხვედით, ამომრჩეველმა ზურგი იმიტომ გაქციაო.
ასეა თუ ისე, ქართული პოლიტიკა, რომელზეც ევროპელები ამბობენ, რომ დალაგდაო, უფრო მეტად აირია და ახლა არავინ იცის, ვისი წევრი ვის პარტიაში იქნება ან მოახერხებენ თუ არა ოპოზიციონერები ერთ საერთო კანდიდატზე შეთანხმებას. მითუმეტეს, რომ გახარიას პარტიის წევრებმა უკვე დააანონსეს, ნაცმოსთან და მის განშტოებებთან არ ვითანამშრომლებთო და… ამ გადმოსახედიდან ისე ჩანს, „ოცნებას“ მხარდამჭერთა შორის უმრავლესობაში დარჩენილი დეპუტატების ოჯახის წევრები თუ შერჩებიან.
კომენტარები