ანა დოლიძისა და ნაზი ჯანეზაშვილის დაპირისპირება გრძელდება – იუსტიციის არამოსამართლე წევრი, ნაზი ჯანეზაშვილი წერს, რომ იუსტიციის უმაღლესი საბჭოს არამოსამართლე წევრს კანონი უკრძალავს პოლიტიკურ საქმიანობას და ანა დოლიძე თანამდებობიდან დღესაც რომ გადადგეს, კანონი უკვე დარღვეული აქვს.
ჯანეზაშვილს რამდენიმე წუთის წინ დოლიძემ უპასუხა და თქვა: „მე ძალიან ვწუხვარ, რომ ნაზი ჯანეზაშვილი არის მიქაუტაძესთან, გვრიტიშვილთან, სერგო მეთოფიშვილთან მხარდამხარ ჩემ წინააღმდეგ მიმართულ კამპანიაში. არ მინდა, ეს დავაბრალო ნოდარ დუმბაძის სახელობის სასწავლებლის კვალიფიკაციას და იურიდიულ კვალიფიკაციას, რომ ის ვერ ერკვევა სამართლებრივ საკითხებში. უფრო სამწუხაროდ, მე ვფიქრობ, რომ ამუშავდა „ქართული ოცნების“ პოლიტიკური მხარდაჭერა, რომელიც უმრავლესობის სახით მიიღო მან, როცა დაინიშნა იუსტიციის საბჭოს წევრად”.
მეტიც, ანა დოლიძის შეფასებით, ნაზი ჯანეზაშვილს „ქართული ოცნების“ წინაშე ვალდებულებები აქვს.
„როგორც ჩანს, მას, ვინც დანიშნა, „ქართული ოცნების“ წინაშე აქვს გარკვეული ვალდებულებები და ახლა, როცა იქმნება ახალი, სამსჯელო, სადისკუსიო ასპარეზი, სამწუხაროდ, გვირიტიშვილთან, მიქაუტაძესა და სერგოსთან ერთად ნაზი ამ ყველაფრის მონაწილეა. რაც შეეხება სამართლებრივ მხარეს, თუ ვაშენებთ სამართლებრივ სახელმწიფოს, ეს შეიძლება იყოს სამართლებრივი დავის საგანი და შეუძლიათ გვრიტიშვილს, მეთოფიშვილსა და ნაზის, სასამართლოს მიმართონ.“ – განაცხადა ანა დოლიძემ.
ნაზი ჯანეზაშვილი სოციალურ ქსელში წერს, რომ ანა დოლიძის შემთხვევაში სამოქალაქო საზოგადოების მხრიდან ჩნდება აბსოლუტურად ლეგიტიმური კითხვები.
“იუსტიციის უმაღლესი საბჭოს არამოსამართლე წევრებს ისევე როგორც მოსამართლეებს, აქვთ გარკვეული, შეიძლება ითქვას, მკაცრი შეზღუდვები, რომელთაგან რამდენიმეზე გავამახვილებ ყურადღებას.
1. იუსტიციის უმაღლესი საბჭოს არამოსამართლე წევრი არ შეიძლება იყოს პოლიტიკური გაერთიანების წევრი ან/და მონაწილეობდეს პოლიტიკურ საქმიანობაში. ეს ძალიან ცალსახაა და სრულიად გასაგები უნდა იყოს ყველასთვის, საერთოდ არ მესმის ამაზე რატომ გვიწევს საუბარი.
ბუნებრივია ის, რომ საზოგადოების მხრიდან კითხვა ჩნდება იმ მოძრაობის პოლიტიკური საქმიანობის შესახებ, რომელიც ანა დოლიძემ სხვებთან ერთად დააფუძნა და როგორც ლიდერი აქტიურად არის ჩართული. ამ ორგანიზაციის პრეზენტაციამ, შემდგომმა განცხადებებმა და აქტივობებმა გააჩინა განცდა, რომ ეს მოძრაობა იმათავითვე პოლიტიკური მიზნებით ჩამოყალიბდა. მაგრამ თუ ეს არასამთავრობო ორგანიზაციაა (რაც ჩემთვის არადამაჯერებელია), მაშინ, საინტერესოა, რა პროექტები აქვთ და რომელი დონორი ორგანიზაციები აფინანსებენ მას. თუ ასე არ არის, საინტერესოა, რომელი წყაროდან ფინანსდება ეს ორგანიზაცია?
2. საბჭოს წევრს უფლება არ აქვს ეწეოდეს სხვა ანაზღაურებად საქმიანობას, გარდა სამეცნიერო, პედაგოგიური და შემოქმედებითი საქმიანობისა. გარდა ამისა, “საერთო სასამართლოების შესახებ” საქართველოს ორგანული კანონის თანახმად, ჩვენი, როგორც წევრების საქმიანობის ხელშეწყობა უშუალოდ იუსტიციის უმაღლესი საბჭოს აპარატის პრეროგატივაა და არა კერძოდ ან რომელიმე ორგანიზაციის მიერ დაქირავებული თანამშრომლის. ანას და მისი ორგანიზაციის საჯარო აქტივობებიდან კარგად ჩანს, რომ მის მიერ დაფუძნებულ მოძრაობას აქვს ოფისი, ჰყავს სტაფი (პრესსამსახური), ამასთან თავად ანა, როგორც ორგანიზაციის ოფიციალური თავმჯდომარე მენეჯმენტს უწევს მოძრაობის ფინანსური და მატერიალური რესურსების მართავს.
3. მესამე კითხვა არის შემდეგი. ვინაიდან ის არის მოძრაობა „ხალხისთვის“ თავმჯდომარე, მე მიმაჩნია, რომ ეს შესაძლოა, შეფასებული იქნას როგორც თანამდებობრივი შეუთავსებლობა “საჯარო მოსამსახურეს უფლება არა აქვს, ეკავოს სხვა თანამდებობა რომელიმე საჯარო დაწესებულებაში (გარდა თავდაცვის ძალების რეზერვისა) ან კერძო სამართლის იურიდიულ პირში, ან იყოს ნებისმიერი დონის წარმომადგენლობითი ორგანოს წევრი”. თანაც იმ დროს, როდესაც მისი მოძრაობის წესდებიდან ნათლად ჩანს, რომ მას, როგორც ამ ორგანიზაციის თავმჯდომარეს, საკმაოდ კომპლექსური ვალდებულებები აკისრია აღნიშნული ორგანიზაციის მიზნებიდან (ისევ წესდებას მოვიშველიებ, სადაც წერია, რომ ამ ორგანიზაციის მიზნებია ორნიშნა ეკონომიკური განვითარება, პროდასავლური საგარეო პოლიტიკა, სახალხო დიპლომატიის ხელშეწყობა და სხვა) გამომდინარე, საბჭოს წევრობის პარალელურად.” – წერს ჯანეზაშვილი სოციალურ ქსელში.
კომენტარები