აქონდროპლაზიის დიაგნოზის მქონე ბავშვების მშობლები საქართველოს ჯანდაცვის სამინისტროსგან კონკრეტულ პასუხს ითხოვენ, როდის იქნება წამალი ვოზორიტიდი ხელმისაწვდომი.
მშობლების ამბობენ, რომ პასუხის არ გაცემის შემთხვევაში, ისინი ისევ პროტესტის უკიდურეს ზომას მიმართავენ და შიმშილობას დაიწყებენ.
“კონკრეტულად რომ ვეკითხებით წამალი როდის შემოდის, ამაზე პასუხი არ აქვთ დღემდე და დღემდე უპასუხოდ გვტოვებენ. [მეკითხება] დრო გადის ჩემთვის და მოვესწრები? მაშინ აღიარონ რომ ბიუჯეტში ფული არ არის და დეკემბერში რომ ჩაირიცხება ფული, თქვენ მიიღებთ ამ წამალს. რატომ გვატყუებენ? რატომ გვათამაშებენ ამ მშობლებს?
ჩვენ უკვე ძალიან მკაცრად გადავწყვიტეთ, თუ არ გამოაცხადებენ როდის იქნება წამალი, ჩვენ უკვე არანაირად აღარ წამოვეგებით მათ გადმოგდებულ ანკესებს, ჩვენ ყველანაირად ვეცდებით რომ ვიშიმშილოთ, სანამ სწორ პასუხს არ მივიღებთ ჯანდაცვისგან, როდის შემოიტანენ წამალს”, – ამბობს აქონდროპლაზიის დიაგნოზის მქონე ბავშვის მშობელი, ეკა ჭონქაძე.
შეგახსენებთ, რომ დაავადებების საკითხებზე მომუშავე საკოორდინაციო საბჭომ აქონდროპლაზიის ეროვნული პროტოკოლი ივლისის თვეში დაამტკიცა. პროტოკოლის დამტკიცებას წინ უძღოდა აქონდროპლაზიის დიაგნოზის მქონე ბავშვების მშობლების საპროტესტო აქციები, რომლებიც რამდენიმე დღის განმავლობაში მთავრობის ადმინისტრაციასთან ღამეს ათენებდნენ.
კომენტარები