სააკაშვილს რამე რომ მოუვიდეს, ვერავინ დარჩება თავის კაბინეტში – რომან გოცირიძე

„ნაციონალური მოძრაობის” დეპუტატის, რომან გოცირიძის თქმით, საქართველოს მესამე პრეზიდენტი, მიხეილ სააკაშვილი დაუყონებლივ უნდა გადაიყვანონ სამკურნალოდ საზღვარგარეთ.

„უკვე დრო არ ითმენს და ეს არ არის არც დღეების საკითხი, ყველა მონაცემი არსებობს, რომ შეუძლებელი იქნება მისი საქართველოში განკურნება. გამომდინარე იმ მრავალი დაავადებიდან, რაც ამ პროცესში მას აღენიშნა და ერთადერთი გამოსავალი არის გადაყვანა, თანაც დროებით, ხომ არ ვამბობთ, რომ გათავისუფლდეს და ა.შ.“

მისივე თქმით, თუ სააკაშვილს არ გადაიყვანენ უცხოეთში სამკურნალოდ, ძალიან ცუდად დაუმთავრდება ეს ხელისუფლებას. როგორც გოცირიძემ აღნიშნა, ძალიან დიდი პრობლემები შეექნებათ არა მარტო ივანიშვილს, არამედ მთელ „ქართული ოცნებას“ და იმ „ადამიანებს, რომლებმაც უზურპირება მოახდინეს მთელი ძალაუფლების და აწამებენ ადამიანს“.

„ივანიშვილს სანქციები სანატრებელი გაუხდება. ახლა ხომ არის მათი ბრძოლა, რომ არ მოხდეს სანქცირებულთა სიაში. სანქცია იქნება მათთვის ძალიან რბილი უსიამოვნება“, – განაცხადა გოცირიძემ.

გოცირიძემ სააკაშვილის საზღვარგარეთ გადაყვანაზე საუბრისას, იულია ტიმოშენკოს შემთხვევაც გაიხსენა, როდესაც ის სამკურნალოდ უკრაინიდან გერმანიაში გადაიყვანეს.

რაც შეეხება მმართველი პარტიის ლიდერის განცხადებას, რომელმაც აღნიშნა, რომ სააკაშვილი არ არის ისე მძიმედ, როგორც „ნაციონალური მოძრაობა“ ამბობს, გოცირიძემ დასძინა, რომ „ამას ამბობენ ცნობილი, აღიარებული ექიმები და პროფესიონალები“.

„როდესაც ასეთ პასუხს იძლევა ხელისუფლების წარმომადგენელი, ეს იმას ნიშნავს, რომ უგუნურია და ვერ საზღვრავს იმ რისკებს, რაც შეიძლება მიხეილ სააკაშვილის დამძიმებით იქნას გამოწვეული“ , – დასძინა გოცირიძემ.

პარტია „ქართული ოცნების” თავმჯდომარე ირაკლი კობახიძის განცხადებით, ყოველდღიურ რეჟიმში საუბრობენ იმაზე, რომ სააკაშვილის სიკვდილის და ჯანმრთელობის რადიკალურად გაუარესების საფრთხეა. „უკვე ერთი წელია ამაზე საუბარი მიდის და ხალხსაც მოაბეზრეს თავი“, – განაცხადა კობახიძემ.

მისი თქმით, ამ თემაზე განცხადებები მხოლოდ პოლიტიკური სპეკულაციებია.

პარტია “ნაციონალური მოძრაობის” წევრები ამბობენ, რომ სააკაშვილის სიკვდილის პირასაა.

შეგახსენებთ, ადვოკატის თქმით, მიხეილ სააკაშვილმა მკურნალობის ეტაპზე 20 კილოგრამი დაიკლო და ამ დრომდე უჭირს გადაადგილება. შალვა ხაჭაპურიძე ამბობს, რომ სააკაშვილმა წამლებისა და საკვების მიღებაზე უარი თქვა.

წყარო: ipn.ge