საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
“18 ოქტომბრის შეჯამება უკრაინაში:
– დრონების გამოყენებით იერიშები კიევსა და უკრაინის ენერგოინფრასტრუქტურაზე გრძელდება. მიუხედავად იმისა, რომ უკრაინელები სწრაფად ახდენენ მიყენებული მატერიალური ზარალის აღდგენასა და შემსუბუქებას, მაინც, სიტუაცია არ არის მარტივი. ნატოს გენერალური მდივნის განცხადებით უკრაინაში უახლოეს დღეებში დრონების საწინააღმდეგო სისტემები ჩავა რაც გარდა სამხედრო უსაფრთხოების ხარისხის გაზრდისა ფსიქოლოგიურადაც გამოასწორებს მდგომარეობას.
– დონეცკისა და ლუგანსკის რაიონების საზღვრის გასწვრივ კრემინა-ზარიჩნე-ლიმანის გზაზე რუსები კონტრშეტევას ცდილობენ. ძალიან ლიმიტირებულია მათი რეალური აქტივობა და როგორც ჩანს პიარს უფრო ემსახურება ეს ყველაფერი, ვიდრე რეალურ სამხედრო მიზანს. მაგრამ, როგორც არ უნდა იყოს, ფაქტი ისაა, რომ უკრაინელებს კრემინას მიმართულებით ინიციატივა აღარ აქვთ აღებული.
– ლუგანსკისა და დონეცკის რაიონების საზღვარზე ლისიჩანსკის მიმართულებით უკრაინელებიცა და რუსებიც ცდილობენ ინიციატივის შენარჩუნებას და საარტილერიო დუელთან ერთად ქვეითებისა და მძიმე ტექნიკის გამოყენება გრძელდება. თუმცა ამ მიმართულებით რუსების დანაკარგი ცოცხალი ძალისა და განსაკუთრებით ტექნიკის მხრივ ბევრად აღემატება უკრაინულს.
– ხერსონის რაიონში რუსების მხრიდან კოლაბორაციონისტების გაყვანა დიდი ინტენსივობით გრძელდება. გამოითქვა სამი შესაძლო ვარაუდი თუ რა შეიძლება ვიხილოთ მომდევნო კვირებში:
1. რეალური ევაკუაცია – რუსები უკრაინელთა იერიშებისა და ცოცხალი ძალის დიდი უპირატესობის ფონზე მდინარე დნეპრზე გამაგრებას შეეცდებიან;
2. გადაჯგუფება – რუსები ახორციელებენ ძირითადი ძალების გაყვანას ზაპორიჟიას რაიონის მიმართულებით, საიდანაც ემზადებიან შეტევისათვის ან უკრაინელთა ჰიპოთეტური იერიშის მოგერიების მცდელობისათვის. ასევე შეეცდებიან ხერსონის შენარჩუნებასაც, მაგრამ ნაკლები პრიორიტეტულობით;
3. შეტევა – რუსები ემზადებიან განსხვავებული სახის დიდი რაოდენობით იარაღის გამოსაყენებლად მშვიდობიანი ქალაქებისა და მოსახლეობის წინააღმდეგ, ხოლო ხერსონის რაიონის მდინარე დნეპრის დასავლეთ ნაპირის გამოყენება მხოლოდ სამხედრო მიზნისათვის მოხდება. ამ ფონზე მოსახლეობის გამოკვება აღარ იქნება გამოწვევა.
რთული სათქმელია რუსეთის განზრახვები, მაგრამ სამივე შესაძლო სცენარს აქვს არსებობის უფლება, თუმცა ყველაზე დამაჯერებელი ალბათ მესამე ვარიანტია, თუმცა ამ შემთხვევაში არც უკრაინელები ისხდებიან მომლოდინე რეჟიმში.”
კომენტარები