რომელ ქვეყანაში მიდის ელჩად მინისტრი ციხელაშვილი და როგორია მისი “სკანდალების სია”

საქართველოს პრემიერ-მინისტრმა, გიორგი გახარიამ, შერიგებისა და სამოქალაქო თანასწორობის საკითხებში ყოფილ სახელმწიფო მინისტრ ქეთევან ციხელაშვილს გაწეული საქმიანობისთვის მადლობა გადაუხადა. პრემიერის განცხადებით, ციხელშვილი საქმიანობას დიპლომატიურ სამსახურში გააგრძელებს. 

„მინდა ქეთევან ციხელაშვილს გადავუხადო მადლობა გაწეული მუშაობისთვის. თითქმის 4 წელია უკვე ის საქართველოს მთავრობაში მოღვაწეობს. მას უკავშირდება ბევრი ძალზედ მნიშვნელოვანი ინიციატივა, მათ შორის – „ნაბიჯი უკეთესი მომავლისკენ“, რომელიც არის სერიოზული, წინგადადგმული ნაბიჯი, მცდელობა იმისთვის, რომ ჩვენს საოკუპაციო ხაზის ორივე მხარეს მცხოვრები ჩვენი მოქალაქეებისთვის შევქმნათ ნორმალური პირობები და აღვადგინოთ სამოქალაქო ხიდები სხვადასხვა მიმართულებით, როგორც ეკონომიკის, ბიზნესის, სოციალური და კულტურული მიმართულებით. ამაში ქალბატონ ქეთევანს სერიოზული წვლილი მიუძღვის.

ის გააგრძელებს მუშაობას დიპლომატიურ ფრონტზე და დარწმუნებული ვარ, რომ მისი კვალიფიკაცია, ცოდნა და დაგროვილი გამოცდილება ხელს შეუწყობს, ჩვენს ქვეყანაში კიდევ უფრო გააღრმავოს და მაღალ დონეზე აიყვანოს ევროპის მიმართულებით, ჩვენი დიპლომატიური მიღწევები. თუ ვინ შეცვლის ქალბატონ ქეთევანს, ამ ძალზე საპასუხისმგებლო თანამდებობაზე, ამის შესახებ საზოგადოებას მოგვიანებით შევატყობინებთ“

15 ივნისიდან ქეთევან ციხელაშვილი ავსტრიაში საქართველოს ელჩის პოზიციას დაიკავებს.

ციხელაშვილი დღეს მინისტრთა კაბინეტის სხდომაზე იმყოფებოდა და სახელისუფლებო გუნდს გამოცხადებული ნდობისთვის მადლობა გადაუხადა.

„დღეს ბოლო მთავრობის სხდომა მქონდა სახელმწიფო მინისტრის რანგში. 15 ივნისიდან შევუდგები ახალ სამუშაოს, რაც არის სრულუფლებიანი ელჩი ავსტრიაში და მუდმივი წარმომადგენელი ეუთოსა და ვენაში წარმოდგენილ სხვა საერთაშორისო ორგანიზაციებში“,

ქეთევან ციხელაშვილი ბოლო რამდენიმე წელია შერიგებისა და სამოქალაქო თანასწორობის საკითხებში სახელმწიფო მინისტრის პოსტს იკავებდა.

მის სახელს ბევრი სკანდალი უკავშირდება –

საოკუპაციო ხაზთან მაცხოვრებლებმა ის არაერთხელ დაადანაშაულეს იმაში, რომ ის ყურადღებას არ აქცევს სოფლებს და თვეების მანძილზე მოქალაქეები “ალიას” საშუალებით ითხოვდნენ მინისტრის ჩასვლას, თუმცა, ამაოდ.

მინისტრი “ალიამ” არაერთ ტყუილში გამოიჭირა, მათ შორის, ყველაზე თვალსაჩინო ტყუილი იყო ცხელ ხაზთან დაკავშირებით, რომელიც მინისტრის თქმით გვქონდა, თუმცა, რეალურად, არ გვქონდა და არ გვაქვს.

მეტიც, მინისტრის სამსახურმა ვერ ახსნა რას ნიშნავს ცხელი ხაზი.

მინისტრის სამსახური რამდენიმე თვის წინ პიარის მთელმა სამსახურმა დატოვა…

ბოლო თვეების მანძილზე ციხელაშვილი აქტიურად აღარ ჩანს, მაგრამ არანაკლებ სკანდალური იყო მისი პასუხი დეფაქტო ხელისუფლებისთვის, როცა ეს უკანასკნელი გენოციდის აღიარებას ითხოვდა.

ციხელაშვილის სკანდალური სია დიდია და უახლოეს დღეებში მას უკან მიდევნებული ლამპარივით გავაყოლებთ ავსტრიაში ყოფილ მინისტრს, რომელიც, დიდი ეჭვი გვაქვს ავსტრიაშიც მოახერხებს პრობლემების შექმნას.