ანი დვალიშვილი
ლევან ხაბეიშვილმა, მის განცხადებას თუ დავეყრდნობით, პარტიის თავმჯდომარის პოსტი საკუთარი სურვილითა და„ კომუნისტური“ მიზეზით, ჯანმრთელობის გაუარესების გამო დატოვა. თანაც, ისიც დაიბარა, პოლიტსაბჭოს შეფად ვრჩები და მალე კვლავ აქტიური ვიქნებიო. ჯერ ერთი, არავის გონია, პოლიტ-საბჭოს თავმჯდომარეს ნაკლები ენერგია სჭირდებოდეს, ვიდრე პარტიისას და მეორეც, თუ ორი თვის შემდეგ, ხაბეიშვილი მწყობრში იქნებოდა, რაღაზე გადადგა, ივლისი და აგვისტო პოლიტიკურად მაინც მკვდარი იქნება და ამას თავადაც ნახავთ. მოკლედ, ლევან ბატონი, როგორც გვეუბნებიან, უბრალოდ მოიცილეს და ეს, არც მეტი და არც ნაკლები, სააკაშვილის პირდაპირი დავალება ყოფილა.
„გაშარჟებული ხაბეიშვილი, რომლის იმიჯის აღდგენა ნაცემმა სახემაც ვერ მოახერხა, არა მხოლოდ ზარქუას საშაყირო იყო, მასთან მოლაპარაკებებზე არ სხდებიან ოპოზიციის ლიდერებიც. ყველამ იცის, რომ ლევანი არც გადაწყვეტილების მიმღებია და ხშირად წესიერად ამბავიც ვერ მიქონდა „ზემოთ“… გვახსოვს, მიშას სოფო ჯაფარიძის გაფეტიშება რომ უნდოდა და პრინციპში, ყველაფერი გააკეთა ამისთვის, ისიც კი იძახა, ჩემი ყური და თვალიაო, მაგრამ ვერც ამან იმუშავა, ამიტომ ჯაფარიძეც ჩაჩოჩდა… ახლა სააკაშვილის მთავარი მოთხოვნა იყო, სასწრაფოდ, სანამ ოფიციალურად საარჩევნო კამპანია დაიწყებოდა, ხაბეიშვილი უნდა მოეშორებინათ, თანაც ისე, რომ მელიასავით განაწყენებული არ დარჩენილიყო და რამე, პატარა პრობლემაც არ მოეტანა პარტიისთვის. მიშას გათვლით, ხალხსაც კითხვებიც არ გაუჩნდებოდა ხაბეიშვილის ჯანმრთელობასთან დაკავშირებით და ადვილად გადააგორებდნენ ამ ამბავს. მართალია, მომენტი ცოტა დაგვიანებულია, მაგრამ მიშამ ესეც დაიკიდა. სააკაშვილს რამდენიმე მთავარი მოთხოვნა ჰქონდა – ლიდერი ქალი უნდა ყოფილიყო, რომლის მიმართაც მას ნდობა აქვს, მასთან მოლაპარაკებებზე ოპოზიცია უნდა დაჯდეს და თან ისეთი იყოს, რომელსაც, უცხოელ პარტნიორებთანაც გააგზავნის. მოკლედ, ზუსტად ისე მოიქცა სააკაშვილი, როგორც ქოცების მიერ გამოცხადებულ ტენდერებში ხდება ხოლმე და როგორც წულუკიანი ეძახის, „ლამაზ თინას“ მოარგო თავისი მოთხოვნები. ამიტომაც, პარტიის წევრებისთვის გაუგებარი მიზეზებით, არ ჩატარდა შიდა არჩევნები, თიკა ბოკუჩავა რომ ვერ გაიმარჯვებდა, ყველაზე კარგად სააკაშვილმა იცოდა. მოკლედ, მიშას ფსონი დადებულია, ხაბეიშვილი გაწეული და ვნახავთ, ეს სვლა მოუტანს თუ არა რამე შედეგს და მოახერხებს თუ არა მთავარს, ნაცების გარშემო ოპოზიციის გაერთიანებასა და არჩევნებზე ერთ ნომრად გასვლას. “ – გვეუბნება პარტიის საქმეებში კარგად ჩახედული წყარო.
პარალელურად, დანარჩენი ოპოზიციური პარტიები, ვერაფრით ახერხებენ გაერთიანებას და სალომე ზურაბიშვილის „ქართულ ქარტიაზე“ ხელისმომწერნი, ფორმალურად არიან ერთად, თორემ საერთო სიებზე ფიქრიც კი არავის სურს. თანაც, ყველამ იცის, რომ არჩევნებისთვის მთავარი პრობლემა ფული იქნება და არავის სურს, სხვა საკუთარ ჯიბეში ჩაახედოს….
კომენტარები