“ქართულ ოცნებას” გაეროდან რუსი დიპლომატი აქებს. დმიტრი პოლიანსკი ორმხრივი კავშირების აღდგენის და ურთიერთობების ნორმალიზების ახალ ეტაპზე გადაყვანის მზაობაზე საუბრობს:
რუსეთის სავაჭრო ბრუნვა საქართველოსთან 2.5 მილიარდ დოლარს შეადგენს. ჩვენ ვართ საქართველოს ნომერ მეორე სავაჭრო პარტნიორი. ასევე, გასულ წელს 1.5 მილიონი რუსი ტურისტი ეწვია საქართველოს. ასე რომ, ეს მოწმობს ჩვენი ორივე ერის აბსოლუტურად მკაფიო სურვილს, აღადგინონ ორმხრივი კავშირები და ნორმალიზდეს ურთიერთობები.
თუმცა, რა თქმა უნდა, არიან ისეთებიც, ვისაც არ აინტერესებს ასეთი სცენარი.
ისინი ფიქრობენ, რომ უკრაინასთან წარმატებას მიაღწიეს. თუმცა საქართველოს ხელმძღვანელობას აღმოაჩნდა საკმარისი სიბრძნე, უარი ეთქვა ასეთ მავნე სცენარზე, რომელიც ჩვენს ევროპელ კოლეგებს არ ასვენებს. ისინი ცდილობენ ყველაფერი გააკეთონ, რათა იმავე ტრაგედიაში ჩააგდონ ეს ქვეყანა, რომელშიც უკვე ჩააგდეს უკრაინა
სამხრეთ კავკასიაში ხელსაყრელი უსაფრთხოების კლიმატის შექმნასთან დაკავშირებით მნიშვნელოვანია სამ ქვეყანას [საქართველოს, აფხაზეთსა და სამხრეთ ოსეთს] შორის ურთიერთობები ნორმალიზდეს. ძალის გამოუყენებლობის შესახებ ხელშეკრულების ხელმოწერის” ინიციატივას პრობლემურ რეგიონში ვითარების დასტაბილურების გარანტიაა, – განაცხადა პოლიანსკიმ.
ცნობისთვის, რუსეთი ბოლო მონაცემით, მეორე ადგილზე მყოფი სავაჭრო პარტნიორი აღარ არის, მან კიდეც ერთი ნაბიჯით ჩამოიწია ქვემოთ და უკვე მესამე ადგილზეა. იმპორტის მიხედვით, პირველ ადგილზეა – თურქეთი, მეორეზე კი – აშშ და მხოლოდ მესამეზე რუსეთი. ექსპორტის მიხედვით კი სამეული ასე გამოიყურება: ყირგიზეთი, ყაზახეთი, რუსეთი.
აღსანიშნავია, რომ რუსი დიპლომატის ამ განცხადებას საქართველოს საგარეო საქმეთა სამინისტრო ამ დრომდე არ გამოხმაურებია.
შეგახსენებთ, რომ შარშან გაეროში რუსეთის მუდმივი წარმომადგენელი უშიშროების საბჭოს სხდომაზე “ქართული ოცნების” პოლიტსაბჭოს განცხადებით მივიდა. აგვისტოს ომთან დაკავშირებით თავის მართლების დროს პოლიანსკიმ სწორედ “ოცნების” სიტყვები გამოიყენა, რომელიც წერდა, რომ ეს სააკაშილის მიერ წარმოეუბული ომი იყო, რომელიც დასავლეთმა დაუკვეთა.მაშინ რუსი დიპლომატის ამ განცხადებაზე ირაკლი კობახიძის პასუხი იყო: “მერე, რა?”
კომენტარები