ლევან ჯავახიშვილი
„ალიას“ ესაუბრება პოლიტიკური მოძრაობა „ტრიბუნას“ დამფუძნებელი, დავით ჭიჭინაძე.
–ბატონო დათო, სალომე ზურაბიშვილმა ფრანგულ გამოცემა „ლე მონდს“ მისცა ინტერვიუ, სადაც ბიძინა ივანიშვილს ოლიგარქი და ფაქტიურად, რუსეთის მოკავშირე უწოდა. ეს პირველი შემთხვევაა, როდესაც პრეზიდენტმა ასე ღიად გაილაშქრა ივანიშვილის წინააღმდეგ. ოპოზიციამ ამის შემდეგ განაცხადა, ზურაბიშვილი გამოკვეთილი და დამოუკიდებელი პროდასავლელი ლიდერია, ამ ინტერვიუს მერე ყველა კითხვის ნიშანი მოიხსნა, რომ ის ბიძინა ივანიშვილზეა დამოკიდებული და მისი ხიდია დასავლეთში, მძიმე დარტყმა მიყენაო. თქვენ რას იტყვით?
– აბა, რას ელოდებოდნენ, სალომე ზურაბიშვილი გამოვიდოდა და იტყოდა, ბიძინა ივანიშვილი პროდასავლური პოლიტიკოსიაო? ეს ჩვენი მკვდარი ოპოზიციაა ბიძინას პროექტი, ისევე როგორც სალომე ზურაბიშვილი და ერთ თამაშს თამაშობენ. ახლა ამ ინტერვიუმ მათ საშუალება მისცა, ზურაბიშვილი გაემართლებინათ და ივანიშვილის ოპოზიციონერად წარმოესახათ ზურაბიშვილი. სალომე ზურაბიშვილმა ბიძინა ივანიშვილის ყველა დავალება შეასრულა, სადაც და როდესაც უჭირდა, ყველა პოლიტიკური პრობლემა მოუგვარა თავისი კომპეტენციის ფარგლებში. „ქართული ოცნების“ ზოგი ლიდერი ეჭვიანობს კიდეც, რომ ზურაბიშვილი, შესაძლოა, მათ კონკურენტად იქცეს, რადგან პრეზიდენტი აშკარად ბიძინას ფავორიტია. თუ ვინმეს ჰგონია, რომ სალომე ზურაბიშვილი ივანიშვილის ოპოზიციონერია, სჯეროდეს, ნეტარ არიან მორწმუნენი. მე ამისი არ მჯერა. ივანიშვილი, ოპოზიცია და ზურაბიშვილი ერთად ატყუებენ ხალხს, მათ არ უნდათ რაიმე შეიცვალოს ქვეყანაში, ძალიან კარგად არიან დალაგებულები. ეს ოპოზიცია ძალიან კომფორტულად ცხოვრობს, ამ რეალობის შეცვლა არაფერში აწყობს, რადგან ხელისუფლებაში მოსვლის შანსი არ გააჩნიათ და ოპოზიციური ნიშის დაკარგვა, ამ კომფორტსაც დააკარგინებს. ხალხის მდგომარეობა, რომელიც დღითი დღე უარესდება, არ ადარდებთ. ხალხზე მზრუნველი განცხადებები მათი ტყუილებზე აგებული პოლიტიკის ნაწილია, სხვა არაფერი.
კომენტარები