კონგრესის გაერთიანებულ სხდომაზე სიტყვით გამოსვლისას აშშ-ს პრეზიდენტმა პირველივე აქცენტი კორონავირუსის პანდემიასა და მისი ადმინისტრაციის დაპირებაზე გააკეთა, რომლის მიხედვითაც პირველი 100 დღის განმავლობაში 100 მილიონი ამერიკელი უნდა აიცრას. ჯო ბაიდენმა თქვა, რომ უკვე 220 მილიონი დოზაა გაკეთებული და კიდევ ერთხელ მოუწოდა მოსახლეობას აცრა გაიკეთონ.
“ამერიკელების 90% ვაქცინაციის ცენტრებისგან 5 მილის რადიუსში ცხოვრობს. ყველას 16 წელზე ზემოთ, ნებისმიერ პიროვნებას შეუძლია ვაქცინა ახლავე გაიკეთოს. წადით და გაიკეთეთ ვაქცინა, ის ხელმისაწვდომია,”-განაცხადა ბაიდენმა.
სწორედ პანდემია იყო მთავარი პრობლემა, რის გამოც საჭირო გახდა იმ ამბიციური გეგმების მომზადება, რომელიც ჯო ბაიდენმა კონგრესს გააცნო, მათ შორის, გეგმები ამერიკული ოჯახებისა და სამუშაო ადგილების შესახებ.
“მე ამერიკის სამუშაო ადგილების გეგმას გთავაზობთ. ეს მეორე მსოფლიო ომის შემდეგ სამუშაო ადგილების ყველაზე დიდი გეგმაა. ის ქმნის სამუშაო ადგილებს ჩვენი ტრანსპორტის ინფრასტრუქტურაში, ჩვენი გზების, ხიდების და ავტომაგისტრალების მოდერნიზებისთვის. დასაქმების ადგილებია პორტების, აეროპორტების, სარკინიგზო კორიდორების და ტრანზიტული ხაზების ასაშენებლად. მე ვთხოვ ვიცე-პრეზიდენტს, ამ ძალისხმევას უხელმძღვანელოს,”-განაცხადა ბაიდენმა.
დღეს ისიც გახდა ცნობილი, თუ სავარაუდოდ, რა სახსრებით მოხდება ამ გეგმის სისრულეში მოყვანა. საქმე ეხება პრეზიდენტის ინიციატივას ყველაზე მდიდრებისთვის გადასახადების გაზრდის შესახებ. მათ, ვისი შემოსავალიც წელიწადში 400 ათასზე ნაკლებია, ეს არ ეხება. ბაიდენის თქმით, საშუალო კლასი ისედაც საკმარისად იხდის.
“ქვეყნის 55-მა უდიდესმა კორპორაციამ გასულ წელს ფედერალური გადასახადებისთვის 0 გადაიხადა. ამ 55 კორპორაციას მოგება 40 მილიარდი დოლარი ჰქონდა. ბევრმა კომპანიამ აარიდა თავი გადასახადებს შვეიცარიის, ბერმუდისა და კაიმანის კუნძულების მეშვეობით,”-განაცხადა ბაიდენმა.
კომენტარები