“ლიდერი დაკავებულია, დაკითხვა უნდა მოხდეს იმ პირობებში, სადაც კომფორტულად იგრძნობს თავს” – ლილუაშვილი ხელისუფლების დამხობის საქმეზე

სახელმწიფო უსაფრთხოების სამსახურის უფროსი გრიგოლ ლილუაშვილი ამბობს, რომ სუს-ის მიერ ხელისუფლების დამხობის საქმეზე დაწყებული გამოძიების ფარგლებში დასაკითხი მთავარი ობიექტი სამედიცინო დაწესებულებაში მკურნალობის კურსს გადის.

მან რუსთავი 2-ის ეთერში ისაუბრა.

გრიგოლ ლილუაშვილი:

“ლიდერი დაკავებულია, თუმცა სხვა საქმეებზე. ობიექტური გარემოებებიც არსებობს და სუბიექტურიც, რის გამოც ბოლომდე ჯერ ვერ ხერხდება ამა თუ იმ პირის დაკითხვა, თუმცა მიმდინარეობს აქტიური ღონისძიებები მათ შორის ექსპერტიზები ამოღებულ ტექნიკაზე, მობილურ ტელეფონებზე და ა.შ. დაკითხვა უნდა მოხდეს შესაბამის დროს იმ პირობებში, სადაც დასაკითხიც და დამკითხველიც კომფორტულად იგრძნობენ თავს და იქნებიან ჯანმრთელები და ვფიქრობ, რომ ეს მომენტი მალე დადგება. 

ერთ-ერთი დასაკითხი მთავარი ობიექტი იმყოფება სამედიცინო დაწესებულებაში, გადის მკურნალობის კურსს, ჩემი ინფორმაციით, მის ჯანმრთელობას საფრთხე არ ემუქრება და უახლოეს ხანებში ალბათ მოგვიხერხდება, რომ უშუალოდ გამოიკითხონ ის პირები, რომლებიც მთავარ იდეოლოგებად მოიაზრებიან ამ საქმეში”

2020 წლის 1-ელ ოქტომბერს სახელმწიფო უსაფრთხოების სამსახურმა ხელისუფლების დამხობის ფაქტზე გამოძიება დაიწყო.