ყოფილი პარლამენტარი, ირაკლი მელაშვილი ირაკლი ღარიბაშვილის წერილზე:
,,იმ განცხადების შემდეგ რაც გუშინ გააკეთა, ირაკლი ღარიბაშვილს სულ ორი გზა აქვს. ერთი, როგორც ამ განცხადებაში უწერია, იბრძოლოს, შესაბამისად გაუჩნდეს შანსი გადაირჩინოს თავი და საკუთარი ოჯახი, მეორე, ახლა დაიჯეროს თუკი გასაჩერებლად რაღაცას დაპირდებიან და ამით მისცეს ბიძინას კარტბლანში, როცა მას მოუნდება მაშინ გაანადგუროს თავად ირაკლი და მისი ოჯახი.
ამას ივანიშვილი ბევრად უფრო იოლად გააკეთებს, თუკი ღარიბაშვილი უკანდახევით საბოლოოდ დაუკარგავს საზოგადოებას იმის იმედს, რომ რომ გუშინდელი განცხადება არა თავისი და ოჯახის ღირსებისთვის საბრძოლველად, არამედ, მორიგი ვაჭრობისთვის გაკეთდა.
თუკი ღარიბაშვილმა ახლა უკან დაიხია და აბსოლუტურად დასაცინი გახდა, ივანიშვილი, რომელსაც რაღაც მიზეზებით ირაკლი ღარიბაშვილის დამცირების და განადგურების სურვილი აქამდეც ჰქონდა, გუშინდელ განცხადებას მას მით უფრო არ აპატიებს და ირაკლის სამაგალითოდ დასჯას თუ განადგურებას კიდევ უფრო ეცდება, რადგანაც ეს არის პირველი შემთხვევა, ანუ პრეცენდენტი, როცა ბიძინას გადასახედიდან მის მიერ წამოწეულმა, როგორც თავად უყურებს, აბსოლუტურად ყველასთვის უცნობმა ტიპმა, რომელიც მან კაცად აქცია, არათუ დაუმორჩილებლობა გაუბედა, არამედ დაემუქრა კიდეც. შესაბამისად, ირაკლის ჯანყის მკაცრად არდასჯამ შეიძლება მის პარტიაში სხვებსაც გაუჩინოს მსგავსი ცდუნება. ეს ჩემი მოგონილი არ არის, ასეთი სისტემების ფუნქციონირების მორიგი ისტორიული კანონზომიერებაა, რომლის მიხედვითაც მოქმედებენ ავტორიტარი ლიდერები.
მე კი მერამდენედ უნდა ვნახო ერთი და იგივე? თანამდეობებზე რომ ხართ ნუ ივლით ნამეტანი თავაწეული, ცოტა ძირას დაიხედეთ, ნუ ჩათვლით რომ ეგ ადგილი სამუდამოდ თქვენია, ნუ შემოიკრებთ მედროვეებს და ნუ მიეცემით მათი ქათინაურებით ტკობას, იმიტომ რომ ისინი გაგყიდიან როგორც კი ფეხი გადაგიტრიალდებათ. სადაა ის ხალხი, რომელთაც ირაკლის ახვედრებდნენ და ალოცვინებდნენ, ან ის გარეწრები, ვინც ამ სცენებს დგამდა? აორთქლდნენ, როცა ღარიბაშვილი თანამდეობაზე აღარ არის. ამიტომ, მოიქეცით ისე, რომ მინისტრები როცა არ იქნებით ადამიანებს თქვენს გვერდზე დადგომის სურვილი გაუჩნდეს. ათწლეულებია ერთი და იგივეს ვუყურებ ამ ქვეყნაში და ვიხვეწები, ცოტა დაფიქრდით მეთქი. ახლა ვიხსენებდი რამდენმა გაუძლო გამოცდას და ბოროტებები არ აკეთა, მოიქცა ისე, რომ კარგი სახელი დატოვა? თქვენ თვითონ მოითვალეთ, რა გამოვა. ჰოდა, რატომ გვიკვირს ასეთი სახელმწიფო რომ გვაქვს ?“
კომენტარები