“გითხრათ, რატომ მოიპოვა ლევან ხაბეიშვილმა საკმაოდ მაღალი პროცენტით გამარჯვება?” – თამარ ბუჩუკური

ჟურნალისტი, თამარ ბუჩუკური:

“ოპოზიციის მხარდამჭერთა ნაწილი აღტკინებულია, ნაწილი – იმედგაცრუებული. ცხადია, ლევან ხაბეიშვილს ვულოცავ გამარჯვებას და იმ მოძრაობის ღირსეულად დაგვირგვინებას ვუსურვებ, რაც დააანონსა და რასაც ყველაზე მსხვილი ოპოზიციური პარტიის თავმჯდომარისგან ელოდებიან.

ახლა, ყველაზე საინტერესო დანარჩენი კანდიდატების პოზიციებია: ჩემთვის პირადად უკიდურესად მძიმე წასაკითხი იყო ნონა მამულაშვილის შეფასება – “გაიმარჯვა ფულმა და არაფორმალურმა მმართველობამ” – თქვა მან. მსგავსი შეურაცხმყოფელი ეპითეტით იმ ამომრჩევლების შემკობა, რომელთა ხმებითაც ის აწ უკვე უმაღლეს საკანონმდებლო ორგანოში იყო შებრძანებული, როგორც მინიმუმ უხერხულია. რა გამოდის? ნონა მამულაშვილის აზრით, ამომრჩეველი გაიყიდა? ეს ხომ ის ბრალდებაა, რასაც ქართული ოცნების მხარდამჭერებს ხშრად წამოვაძახებთ და შევახსენებთ ხოლმე… მან ამ განცხადებით ორი რადიკალური პოლიტ. ძალის ამომრჩეველი (ქართული ოცნების და ენმ-ის) ერთ სიბრტყეში განიხილა და ცხადია, საწყენია. საგულისხმოა, რომ არჩევნების შედეგებს ზუსტად იგივე სიტყვებით გამოეხმაურა ნუგზარ წიკლაურიც, რომელიც ცნობილია, რომ მხარს მელიას უჭერდა…

რაც შეეხება კიდევ ერთ კანდიდატს, აწ უკვე ყოფილ თავმჯდომარეს, ნიკანორ მელიას. ის ამბობდა, რომ “ხალხი ისეთი ბნელი არ არის, ხაბეიშვილი აირჩიონო.” მისი სიტყვებით გამოდის, რომ მხარდამჭერები ბნელები არიან?! დღევანდელ განცხადებაში მელიამ აღნიშნა, რომ ის ენმ-ში რჩება ანუ “ბნელების” პარტიაში აგრძელებს მუშაობას?! ცხადია, მისი ეს გამონათქვამი ძალიან უხერხული და გულანთებული მოქალაქეების დაკნინების უხეში გამოვლინება იყო.

ბოლოს კი, გიორგი მუმლაძე, რომელიც ყოველთვის პოლიტიკური კულტურით გამოირჩევა… დასანანია, რომ ამომრჩევლების ფართო მასამ ის კარგად ვერ გაიცნო დროის სიმცირის გამო. ვიმედოვნებ, რომ ეს ადამიანი მნიშვნელოვან როლს შეასრულებს ქვეყნის პოლიტიკურ ცხოვრებაში.

ბოლოს კი, რატომ მოიპოვა ლევან ხაბეიშვილმა საკმაოდ მაღალი პროცენტით გამარჯვება და თან ისე, რომ მეორე ტურის საჭიროება არც კი დამდგარა? ფაქტია, რომ ოპოზიციის ამომრჩეველმა მხარი ხაბეიშვილის ლოზუნგს – მოძრაობას, მოძრაობას და მოძრაობას დაუჭირა და რაც მთავარია, ფაქტობრივად, არჩევნები მიშა სააკაშვილის საკითხის დღის წესრიგში დაბრუნებამ განაპირობა. სწორედ ამიტომაა ეს გამარჯვება უდიდესი პასუხისმგებლობა.