“ეს პოლიტიკური თაღლითობაა, ეს დანაშაულია” – გახარია ხელისუფლებას

ყოფილი პრემიერ–მინისტრი, გიორგი გახარია:

აშშ არის საქართველოს სტრატეგიული პარტნიორი და, რაც ამაზე ბევრად უფრო მნიშვნელოვანია, აშშ არის ქვეყანა, რომელიც საქართველოს სუვერენიტეტს, ტერიტორიულ მთლიანობას და არაღიარების პოლიტიკას უჭერდა ყოველთვის მხარს და შემქმნელი იყო ამ არაღიარების პოლიტიკის. 

ამიტომ მე ვთვლი, რომ ნებისმიერი ქმედება, რომელიც ჩრდილს აყენებს ჩვენი ქვეყნების სტრატეგიულ თანამშრომლობას, არის დანაშაული, არც მეტი არც ნაკლები, ეს არის დანაშაული. ვიღაცა გააზრებულად სჩადის ამ დანაშაულს, ვიღაც – გაუაზრებლად, მაგრამ ეს ფაქტია.

გუშინ  დავბრუნდი აშშ-დან, საბედნიეროდ, აშშ-ში არავის აქვს იმის ილუზია, რომ ეს არის ქართველი ხალხის განწყობა, მათ ძალიან კარგად იციან და ხედავენ, რომ ქართველი ხალხის ცივილიზაციური არჩევანი ევროპული, დასავლური განვითარების მიმართულებით, არის ურყევი.

გასაგებია, რომ ჩვენი დღევანდელი ხელისუფლება რაღაც ბუნდოვანებას ქმნის, ერთის მხრივ გვეუბნება, რომ დასავლეთი ჩვენი მტერია და მეორეს მხრივ გვეუბნება, რომ ევროკავშირში მიგიყვანთ 2030 წელს, ეს, ჩვეულებრივი, მარტივი პოლიტიკური თაღლითობაა, რომელიც, იმ შემთხვევაში, თუ ჩვენ ყველას ერთად ქართველებს, ჩვენს ნამდვილ სტრატეგიულ მეგობრებს გვექნება მკაფიო პოზიცია, რა თქმა უნდა, ეს თაღლითობა არავის არ გაუვა!