არ უნდა დაგვავიწყდეს, რომ ზუსტად ეს მუნიციპალიტეტი, არის ის ისტორიული მონაკვეთი, რომელიც აკავშირებდა დასავლეთს და აღმოსავლეთს, სანამ რიკოთის გვირაბი გაკეთდებოდა – კახა კუჭავა

პარლამენტის თავმჯდომარის კახა კუჭავას სიტყვით გამოსვლა „ქართული ოცნების“ ხარაგაულის მერობის კანდიდატის კობა ლურსმანაშვილის წარდგენაზე

ჩვენ ვიმყოფებით ძალიან ლამაზ მხარეში, გამორჩეულში თავისი ბუნებით რაზეც ყველა თანხმდება  თუნდაც იმ  სტატუსის გამო, რომელიც  ამ რეგიონში ბორჯომ-ხარაგაულის ტყე-პარკს აქვს.

ბორჯომ-ხარაგაულის ტყე-პარკი- თავისი უნიკალური ბიომრავალფეროვნებით უმნიშვნელოვანესია როგორც შიდა ისე გარე ტურიზმისთვის.

თქვენ კარგად გახსოვთ, თუ  რამდენად დიდ ყურადღებას აქცევს „ქართული ოცნება“ გარემოზე ზრუნვას და ეროვნული პარკების და დაცული ტერიტორიების პოტენციალის ბოლომდე გამოყენებას.

როდესაც ვსუბრობთ პოტენციალის ბოლომდე გამოყენებაზე, აუცილებლად უნდა გავითვალისწინოთ ის სარგებელი, რომელიც მოსახლეობისთვის მოაქვს ამ ეროვნულ პარკებს და დაცულ ტერიტორიებს.

აუცილებელია შეიქმნას სარგებლის მთლიანი ჯაჭვი,  რომელიც საშუალებას მისცემს თითოეულ ადგილობრივს ბოლომდე ჩაერთოს  თავისი კუთხის,  მხარის განვითარებაში  და მიიღოს სარგებელი.

როდესაც ვსუბრობთ ადგილობრივებზე,  არ შეიძლება არ აღვნიშოთ ის განსაკუთრებული შრომისმოყვარეობა, რითაც გამოირჩევა ხარაგაული.

ბევრ ჩვენგანს გვიმგზავრია ამ ულამაზეს მხარეში, გვითქვამს, რომ  ციცაბო ფერდობებზე მიწების დამუშავება,  შრომა, სოფლის მეურნეობის სხვადასხვა დარგები, რომელიც აქ  განვითარებულია, ნამდვილად იმსახურებს აღნიშვნას.

ეს ის მოსახლეობაა, რომელიც თავისი შრომით, ყოველდღიურად ამტკიცებს, რამდენად აუცილებელია ყველამ ჩვენი წვლილი შევიტანოთ ჩვენი ოჯახების, რეგიონის და  ჩვენი ქვეყნის განვითარებაში.

არ უნდა დაგვავიწყდეს, რომ ზუსტად ეს მუნიციპალიტეტი,  ეს მონაკვეთი, არის ის ისტორიული მონაკვეთი, რომელიც აკავშირებდა დასავლეთს და აღმოსავლეთს, სანამ რიკოთის გვირაბი გაკეთდებოდა.  აქ მიმდინარეობდა ვაჭრობა დასავლეთს და აღმოსავლეთს შორის.  ეს ისტორიული მნიშვნელობა აუცილებელია სწორად გავიგოთ და ბოლომდე გამოვიყენოთ ის რეალური შესაძლებლობები, რომელიც  რეგიონში არსებობს.

როდესაც ვსაუბრობთ რეგიონის განვითარებაზე, ძლიერ საქართველოზე, არ უნდა დაგვავიწყდეს, რომ აუცილებელია ძლიერი თვითმმართველობა- თვითმმართველობა, რომელიც მოგვცემს შესაძლებლობას არ დავკმაყოფილდეთ მიღწეულით.

ამ მუნიციპალიტეტში ბევრი პროექტია განხორციელებული, თუმცა, რა თქმა უნდა, საჭიროა კიდევ უფრო დიდი ტემპი და ამას აუცილებლად მივაღწევთ  ძლიერი თვითმმართველობით, ძლიერი მერით და საკრებულოთი, რომელსაც ზურგს უმაგრებს ცენტრალური ხელისუფლება.  ყველა ამ პროექტის განხორციელებას შევძლებთ დროულად და ადგილობრივების ინტერესების გათვალისწინებით.

ჩემთვის განსაკუთრებით  სასიხარულოა კანდიდატად წარმოვადგინოთ კობა ლურსმანაშვილი- ადამიანი, რომელთან ერთად  მე-9 მოწვევის პარლამენტში ოთხი წელი ვიმუშავე, სამი წელი  ერთ კომიტეტში ვმუშაობდით.

ნებისმიერ საკითხზე იგი აუცილებლად ახსენებდა ხარაგაულს და ყოველთვის ცდილობდა მაქსიმალურად გაეთვალისწინებინა ამ მუნიციპალიტეტის ინტერესები, რაც ლოგიკურიცაა, იგი ხარაგაულის მაჟორიტარი იყო, მანამდე იყო მერი, ახლაც ასრულებს მერის მოვალეობას და დარწმუნებული ვართ, რომ აუცილებლად დამაჯერებელ გამარჯვებას მოიპოვებს და გააგრძელებს თავისი მუნიციპალიტეტის, თავისი ხალხის მსახურებას.