რაზე მიანიშნებს თალაკვაძის გადადგომა? – “კომკავშირლებს” ბიზნესის აქტიური ლობისტები ჩაანაცვლებენ – ლევან ლორთქიფანიძე

პოლიტოლოგი, ლევან ლორთქიფანიძე, სოციალურ ქსელში, წერს:

“როგორ შეიძლება ჩვენ ირგვლივ განვითარებულ მოვლენებს პოლიტიკა ან დემოკრატია ვუწოდოთ? ტყუილი და სიყალბე ტრიალებს მხოლოდ.

არჩილ თალაკვაძემ თანამდებობიდან გადადგომა გასაოცარი არგუმენტებით დაასაბუთა. თურმე, ოპოზიციასთან მრავალთვიანი მოლაპარაკებების შედეგიანად დასრულების გამო, ის ნეიტრალურობას ვეღარ შეინარჩუნებს. თურმე, რადგან მოლაპარაკებებში ის კონკრეტულ მხარეს იდგა, წარმომადგენლობით ოპოზიციას პრეზიდიუმიდან ვეღარ დაელაპარაკება. რატომ? რა ლოგიკით? პირიქით არ უნდა იყოს? თუ ამდენი ხანია ოპონენტებთან ერთად ერთ მაგიდასთან ზის, მათთან მოლაპარაკება და შეთანხმება მოახერხა, ყველა მათგანი გაიცნო, შევსენებებზე ორმაგი ესპრესოც დალია მოწინააღმდეგეთა კამპანიაში, პარლამენტის სხდომებს რატომ ვერ წაიყვანს? იქ რა ბზიკი უკბენს და რატომ მოუნდება ოპოზიციის პროცედურული დაჩაგვრა? თან აბსოლუტური ტყუილია თითქოს პარლამენტის თავმჯდომარეს ნეიტრალურობა მოეთხოვება. მსოფლიოს ყველა პარლამენტის თავმჯდომარე კონკრეტულ პარტიას წაემოადგენს. მათ ერთადეთი ვალდებულება აქვთ, პარტიული კუთვნილების მიუხედავად პატივი სცენ რეგლამენტს!

რაზე მიანიშნებს არჩილ თალაკვაძის გადადგომა?

1. ვცხოვრობთ ქვეყანაში, სადაც პარლამენტის თავმჯდომარეც კი არაფერს წარმოადგენს და ერთ წამში შეუძლიათ მისი გამოძევება კაბინეტიდან. პარლამენტის თავმჯდომარეს არ აქვს პოლიტიკური წონა და გავლენა თავისი პოზიციების შესანარჩუნებლად.

2. ახალი შეთანხმების მიხედვით “ქართულ ოცნებას” მოუწევს საპარლამენტო თანამდებობების გადანაწილება ოპოზიციისთვის. მაშასადამე, რამდენიმე კომიტეტის თავმჯდომარეს მოუწევს კაბინეტის, მანქანის, აპარატისა და სხვა პრივილეგიების დათმობა. გადაყენების წინ სულ მცირე უკმაყოფილება თუ გამოხატეს მოქმედმა თავმჯდომარეებმა, შეახსენებენ, რომ მხოლოდ ისინი კი არა, მთლად პარლამენტის მეთაურიც კი შეეწირა ოპოზიციასთან შეთანხმებას.

3. “ქართული ოცნება” შეთანხმებაზე ხელმომწერ პირს ათავისუფლებს და ამგვარად თავის ორთოდოქს ამომრჩეველს ატყობინებს, რომ მოლაპარაკებების შედეგებით უკმაყოფილოა.

4. კახა კუჭავა თავისი ბიოგრაფიით დაკვშირებულია რამდენიმე მსხვილ იმპორტიორ კომპანიასა და მოპოვებითი მრეწველობის კორპორაციებთან , რომლებიც ჩვენს ბუნებრივ რესურსებს ეპატრონებიან და ყიდიან, ეფუძნებიან ექსტრაქტივსტულ ლოგიკას, ხელს უშლიან ადგილზე მაღალი რანგის წარმოების განვითარებას. როგორც სჩანს, ბიძინა ივანიშვილის ყოველდღიური პოლიტიკისაგან ნელ-ნელა დისტანცირების შემდეგ, თალაკვაძისნაირ “კომკავშირლებს” ბიზნესის აქტიური ლობისტები ჩაანაცვლებენ.”