ხელისუფლება ერთმნიშვნელოვნად ამბობდა, რაც არ უნდა იყოს, მე ამ დოკუმენტს ხელს ვაწერო! – ვახტანგ მეგრელიშვილი

„გირჩის“ წევრის, ვახტანგ მეგრელიშვილის განცხადება, შეხვედრის დასრულების შემდეგ:

„შეთანხმება ვერ მოხდა, მაგრამ დოკუმენტი, რომელიც ახლა ხელში მიჭირავს, ჩემი აზრით, იმსახურებს ძალიან სერიოზულ ყურადღებას, ყურადღებას, რომელიც იდეაში ალბათ ხვალიდან გახდება თქვენი განსჯის საგანი. ჩემი აზრით, ცოტა მეტი დაძაბულობა, ცოტა მეტი მუშაობა და ეს დოკუმენტი შეიძლებოდა გამხდარიყო ძალიან კარგი რესტარტის საშუალება, იმის საშუალება, რასაც ჩვენ ამდენი ხნის განმავლობაში ვიძახდით. ანუ, ძალიან უცნაურია, რომ ასე დამთავრდა ეს მდგომარეობა, მაგრამ ვფიქრობ, რომ უკვე ჩვენი შიდა საქმეა, რომ თითოეულ ამ პუნქტზე, რა არის სწორი და რა არასწორი, ხვალიდან ვილაპარაკოთ.

ჩემი აზრით, დოკუმენტში ძალიან მაგარი რაღაც ეწერა ის, რომ ასე ვთქვათ, მელიას პრობლემა გვარდებოდა ამნისტიით 20 ივნისის და მთელი იმ მოვლენების, რაც 20 ივნისის განმავლობაში განვითარდა, ასევე ძალიან მნიშვნელოვანი მგონია ის წინადადება, რომელიც თვითონ შეხვედრის დროს დააყენა სალომე სამადაშვილმა „ნაციონალური მოძრაობიდან“, რაც გულისხმობდა, რომ იგივე მექანიზმები ყოფილიყო გამოყენებული რურუას ქეისისთვისაც. ჩემი აზრით, ეს შესაძლებელია ტექნიკურად და დღესაც შესაძლებელია ფიქრი ამის გაგრძელებაზე.

ერთადერთი საკითხი, რომელიც რჩებოდა, ვადამდელი არჩევნების საკითხია. პრობლემა მდგომარეობს იმაში, რომ მხარეებმა კომპრომისი ვერ დაინახეს. სხვათაშორის, ხელისუფლება ერთმნიშვნელოვნად ამბობდა, რომ რაც არ უნდა იყოს, მე ამ დოკუმენტს ხელს ვაწერო, შეიძლება, მცირე შენიშვნები მაქვსო, მაგრამ მე ამ დოკუმენტს ხელს ვაწერო.

ოპოზიციამ თავი შეიკავა იმის გამო, რომ რურუას ქეისი არ იყო ნათლად აღწერილი, თუმცა მედიატორმა სიტყვიერად თქვა, ახსნა, თუ როგორ შეიძლებოდა ამ პრობლემის მოგვარება, რაზეც ოპოზიცია არ დათანხმდა.”