ნანა სულავა
„ალიას“ კითხვებს პასუხობს საზოგადოება „ერი და სახელმწიფოს“ თავმჯდომარე ზვიად ტომარაძე:
– თქვენ მიერ ორგანიზებული ხალხმრავალი აქციების შემდეგ ფაქტია, რომ დაჟინებით აღარ ეწევიან კოვიდპასპორტების აუცილებლობის შესახებ აგიტაციას. როგორ ფიქრობთ, აქციებმა გამოიღო შედეგი თუ ზოგადად, მსოფლიოში კოვიდთან დამოკიდებულება შეიცვალა?
– როგორც იცით, 24 აგვისტოდან მოყოლებული 12 აქცია ჩავატარეთ, მათ შორის მასშტაბებით გამოსარჩევია 28 ნოემბრის და 5 დეკემბრის აქციები, სადაც 10 ათასი და 15 ათასი კაცი გამოვიდა. ყველას გვახსოვს, თუ რა მდგომარეობა იყო კოვიდტერორის მხრივ ჩვენს აქციებამდე, კარგად გვახსოვს ის უიმედობა, პესიმიზმი და ნიჰილისტური სტატუსები, რომელიც სოციალურ ქსელში იწერებოდა, რომ ერს სძინავს, აქციებზე ხალხი არ გამოდის, ფეისბუკში კაკუნში ყველა მაგარია და ა.შ. მრავალრიცხოვანი აქციების წყალობით, ხალხში გაჩნდა ოპტიმიზმი და გამარჯვების იმედი. რაც მთავარია, შემუშავებული სტრატეგიის და აქციაზე გაკეთებული სწორი გზავნილების წყალობით, დღეს მორალური უპირატესობა ჩვენს მხარეზეა. კოვიდტერორი დღეს საქართველოში მორალურად დამარცხებულია და მალე ფაქტობრივ გამარჯვებასაც ვიზეიმებთ! ჩვენ ვხედავთ, თუ რა მდგომარეობაა ევროპის სხვადასხვა ქვეყნებში, მაგალითად, გერმანიაში, ავსტრიაში, ჰოლანდიაში… სამწუხაროდ, იქ კოვიდტერორი აქტიურ ფაზაშია…
– ყოფილმა ჯანდაცვის მინისტრმა თანამდებობიდან წასვლის შემდეგ განაცხადა, რომ ბევრი ადამიანი კოვიდით კი არა რეანიმაციული ინფექციების შედეგად გარდაიცვალაო. კლინიკებში შიდა ინფექციები იგულისხმა? აბა, რა იცის მან, რის შედეგად გარდაიცვალნენ? ქვეყანაში 14 ათასი გარდაცვლილიდან მხოლოდ 39-ის ისტორია შეისწავლეს და ისიც არ არის სრულყოფილად გამოკვლეული. ახლა ამბობენ, იმ ქვეყნებში, სადაც ომიკრონია გავრცელებული, სიკვდილიანობის მაჩვენებელი დაბალიაო და ამას იმით ხსნიან, რომ იქ მოსახლეობის უმრავლესობა აცრილია.
– მოწესრიგებულ სახელმწიფოში ამ განცხადების გამო გამოძიება დაიწყებოდა, ჩვენთან გაატარეს, ჩვენმა ორგანიზაციამ ოფიციალურად მიმართა გენერალურ პროკურორს, ეკატერინე ტიკარაძის ამ განცხადების გამო გამოძიება დაეწყოთ. როდესაც ჯანდაცვის ყოფილი მინისტრი ამბობს, რომ ათასობით ადამიანის გარდაცვალება არა ვირუსის, არამედ ზოგიერთი კლინიკის არაკეთილსინდისიერების ბრალია, ამაზე წაყრუება დანაშაულია. ყოველთვის ეჭვი მეპარებოდა და ახლაც არ მჯერა კოვიდგარდაცვალების სტატისტიკის, გამორიცხულია ამდენი ადამიანი კოვიდით იღუპებოდეს. საქართველოში ყოველწლიურად დაახლოებით 50 000 ადამიანი კვდება, საშუალოდ, დღეში – 137. დიდი ალბათობით, სხვადასხვა მიზეზით გარდაცვლილებს კოვიდგარდაცვალებას აწერენ, რომ სიტუაცია დაამძიმონ და ვაქცინაცია წაახალისონ! თუ ასე არაა და ჩემი ეჭვები უსაფუძვლოა, მაშინ რატომ არ დგება ეპიდსიტუაციის მართვაზე პასუხისმგებელი პირების საკითხი? თუ ყველაფერი კარგადაა, ხალხმა აივანზე ტაში უნდა დაუკრას და როდესაც ამდენი ხალხი იღუპება, არავინ არ უნდა აგოს პასუხი?
– ახალი ჯანდაცვის მინისტრი გამოვიდა და განაცხადა, ადამიანებმა ნაკლებად უნდა მიიღონ მონაწილეობა მასობრივ ღონისძიებებზეო. ეს განცხადება რამდენად არის ლოგიკური, როდესაც მასობრივ ღონისძიებებში ახალი წლის დღეებში ხელისუფლებამ 5 მილიონი დაიხარჯა? მარტო დედაქალაქში კი არა, რეგიონებშიც ჩატარდა კონცერტები. ხალხს ზეიმი სჭირდება, სიხარული მოენატრაო, განაცხადეს. ეს ხომ არასახელმწიფოებრივი მიდგომაა ამ პრობლემის მიმართ? ეს ხომ არ გამოიწვევს კოვიდთან დაკავშირებით უკონტროლო მდგომარეობას?
– ახალ ჯანდაცვის მინისტრს მოვუწოდეთ, რომ ამირან გამყრელიძე და პაატა იმნაძე დაუყოვნებლივ გაათავისუფლოს დაავადებათა კონტროლის ხელმძღვანელი პოსტებიდან. რაც შეეხება მასობრივ ღონისძიებებზე დასწრებას, რა თქმა უნდა, ალოგიკურია, უკვე 2 წელია დაშინებით, ჩაკეტვებით და სახლში გამოკეტვებით, ხალხს ფსიქოზი დამართეს, საარჩევნოდ ასიათასიანი აქციები რომ ტარდებოდა, მაშინ სად იყო კორონა? იგივეს ვიკითხავ საახალწლო ღონისძიებებზე და კონცერტებზეც… ესპანეთის პრემიერმა 11 იანვარს განაცხადა, დადგა დრო კორონას ვუმკურნალოთ ისე, როგორც ჩვეულებრივ გრიპს და შეწყდეს როგორც ინფიცირების შემთხვევების, ასევე ჰოსპიტალიზაციის რაოდენობების თვლაო. რამდენი ხანია, მე და ჩემი მეგობრებიც ამას ვამბობთ და საქართველოს ხელისუფლებამაც იგივე მიდგომებით უნდა იხელმძღვანელოს.
– როგორია თქვენი სამომავლო გეგმები?
– ჩვენ ვაგრძელებთ ბრძოლას და მწვანე ბარათების გაუქმების მოთხოვნით, 23 იანვარს აქციას გავმართავთ. ასევე ვითხოვთ გამყრელიძის და იმნაძის თანამდებობიდან გადაყენებას, საკოორდინაციო საბჭოდან გამოძევებას და მათ წინააღმდეგ გამოძიების დაწყებას. ასევე სკოლებში პირბადის ტარება უნდა გაუქმდეს და შეწყდეს ტესტირება, რომელიც რეალურად სეზონური გრიპებისგან ვერ არჩევს კორონა ვირუსს და ფულის საკეთებელი მანქანაა, ერთი დღე ტესტირება, რომელსაც სანდოობა არ გააჩნია, 600 000$ დოლარამდე უჯდება ჩვენს სახელმწიფოს და აშკარაა რომ ვიღაცა ხელს ითბობს ამით. ასევე ვაგრძელებთ სამართლებრივ ბრძოლას. პარლამენტის ადამიანის უფლებათა დაცვის კომიტეტში მალე გაიმართება ჩვენი პეტიციის განხილვა, რომელიც მწვანე პასპორტების გაუქმების შესახებ არის. ასევე მალე უნდა გაიმართოს კოვიდტერორთან დაკავშირებული 4 სარჩელის განხილვა, როგორც საქალაქო, ასევე საკონსტიტუციო სასამართლოში.
კომენტარები