“შესაძლოა, „’ოცნებამ“ „ენმ“-ის ჯინაზე რაიმე მოიფიქროს, რასაც მე არ მივესალმებოდი…” – ვახტანგ მეგრელიშვილი

„გირჩის“ წევრმა, ვახტანგ მეგრელიშვილმა განაცხადა:

„შარლ მიშელის შეთანხმებიდან ჩვენთვის ყველაზე მნიშვნელოვანი პუნქტი იყო საკონსტიტუციო ცვლილებების შესაძლებლობა და ისეთ მომენტში გამოვიდა „ქართული ოცნება“ ამ შეთანხმებიდან, რომ ფაქტობრივად ჩვენთვის ყველაზე მნიშვნელოვანი საკითხი დარჩა შუა გზაზე. ის ინიცირებულია. ჩვენ ყოველთვის მიგვაჩნდა, დღესაც ასე მიგვაჩნია და მივიღებთ მონაწილეობას ნებისმიერ განხილვაში, ნებისმიერ დისკუსიაში, რომელიც შეეხება იმას, რომ ამ ქვეყანაში პოლიტიკურ პარტიებს დამოუკიდებლად უნდა შეეძლოთ პარლამენტში შემოსვლა და ამის წინაპირობაა ზუსტად ის ორპროცენტიანი შეთანხმება, რომელიც შარლ მიშელის ფარგლებში დაიდო. მაგრამ მე არ ვარ დარწმუნებული, მას შემდეგ, რაც „ქართული ოცნება“ გამოვიდა შეთანხმებიდან, რომ ის ასეთივე ენთუზიაზმით გააგრძელებს თანამშრომლობას ოპოზიციასთან, მათ შორის ისეთ საკითხებზე, რომლებიც დიდ პარტიებს დიდად არ აწყობთ და ეს არის აქ მთავარი ამბავი. მე, მაგალითად, მიხარია, რომ „ნაციონალურმა მოძრაობამ“ ერთი მხრივ გააკეთა განცხადება, რომ მისთვის მნიშვნელოვანია და ამიტომ დარჩა პარლამენტში. მაგრამ, რომ ვიცი ამ ორი პარტიის ერთმანეთთან დაპირისპირება, შესაძლოა, „ქართულმა ოცნებამ“ „ნაციონალური მოძრაობის“ ჯინაზე რაიმე მოიფიქროს, რასაც მე ნამდვილად არ მივესალმებოდი და მინდა, საკონსტიტუციო ცვლილებები ბოლომდე მივიდეს.

მაღალი ბარიერი ყველას უბიძგებს, რომ „ნაციონალური მოძრაობის“ ან „ქართული ოცნების“ გარშემო შეგროვდნენ. დაბალი ბარიერი, მათ შორის ამ პარტიებში მყოფ პოლიტიკოსებს აძლევს საშუალებას, ისეთი მორჩილები არ იყვნენ პარტიისა და ლიდერის, როგორც ხუთპროცენტიანი ბარიერის შემთხვევაში იქნებოდა“