ბავშვთა დაცვის საერთაშორისო დღესთან დაკავშირებით, საქართველოს პროკურატურა უწყებაში გატარებული სხვადასხვა ღონისძიებების შესახებ ინფორმაციას ავრცელებს.
საქართველოს პროკურატურა აქტიურად მუშაობს ბავშვზე მორგებული მართლმსაჯულების სისტემის განვითარებაზე.
პროკურატურისთვის მნიშვნელოვანია მართლმსაჯულების პროცესში ბავშვთა უფლებების დაცვის გარანტიების გაძლიერების ხელშეწყობა ბავშვის უფლებათა დაცვის, არასრულწლოვნის საუკეთესო ინტერესების პრიორიტეტულობის, დისკრიმინაციის აკრძალვის, თანაზომიერების პრინციპების საფუძველზე.
საქართველოს პროკურატურა მუდმივად ზრუნავს ბავშვზე მორგებული მართლმსაჯულების განვითარებაზე, რათა თითოეული არასრულწლოვანი უზრუნველყოფილი იყოს ბავშვის უფლებებსა და საჭიროებებზე მორგებული, სწრაფი, ხელმისაწვდომი, ასაკის შესაბამისი მართლმსაჯულებით.
უკანასკნელი წლების განმავლობაში, უწყებამ, არაერთი წარმატებული ნაბიჯი გადადგა არასრულწლოვანთა საუკეთესო ინტერესებსა და მათ კეთილდღეობაზე ორიენტირებული, ეფექტიანი მართლმსაჯულების სისტემის დანერგვის მიზნით.
კანონთან კონფლიქტში მყოფ არასრულწლოვანთა მიმართ პრიორიტეტულად გამოიყენება სისხლისსამართლებრივი დევნის ალტერნატიული მექანიზმები. განრიდების/განრიდება-მედიაციის პროგრამაში ჩართულ არასრულწლოვანთა რაოდენობა, მნიშვნელოვნად აღემატება არასრულწლოვანთა მიმართ სისხლისსამართლებრივი დევნის დაწყების მაჩვენებელს. აღნიშნული გულისხმობს ბავშვის საჭიროებებზე მორგებულ სარეაბილიტაციო აქტივობებში მათ ჩართვას, რაც ცხელს უწყობს არასრულწლოვნის რესოციალიზაცია-რეაბილიტაციას.
არასრულწლოვანთა სისხლის სამართლის საქმეებზე საპროკურორო ხარისხის გაუმჯობესების მიზნით, მუდმივ რეჟიმში ხდება სისხლის სამართლის საქმეთა მონიტორინგი და შესაბამისი სახელმძღვანელო მითითებების შემუშავება.
პროკურორთა სპეციალიზაციას და გადამზადებას არასრულწლოვანთა მართლმსაჯულებაში მუდმივი და განგრძობადი ხასიათი აქვს.
არასრულწლოვანთა მართლმსაჯულებაში მტკიცებულებებზე დაფუძნებული სისხლისსამართლებრივი პოლიტიკის დანერგვის მიზნით ყოველწლიურად აქტიურად ხორციელდება კვლევითი საქმიანობა.
არასრულწლოვანთა მართლმსაჯულებაში არსებული პრობლემების დაძლევისა და სისტემის სრულყოფის ხელშეწყობის მიზნით ყოველწლიურად იკრიბება პროკურატურის ინიციატივით შექმნილი არასრულწლოვანთა ადგილობრივი მულტიდისციპლინური საბჭოები.
მართლმსაჯულების პროცესში ჩართულ არასრულწლოვანთა რესოციალიზაცია-რეაბილიტაციის ეფექტიანი განხორციელების მიზნით, პროკურატურა აქტიურადაა ჩართული ძალადობის მსხვერპლ ბავშვთა დაცვის მიმართვიანობისა და რთული ქცევის მქონე არასრულწლოვანთა რეფერირების მექანიზმებში.
პროკურატურა განაგრძობს ბავშვზე მორგებული მართლმსაჯულების კონცეფციის განვითარებას. ყოველწლიურად ერთ სტრუქტურულ ერთეულში ბავშვზე მორგებული ინფრასტრუქტურის მოწყობა იგეგმება.
საქართველოს პროკურატურა ყველა ბავშვს ბავშვთა დაცვის საერთაშორისო დღეს ულოცავს და უსაფრთხო გარემოში ცხოვრებას უსურვებს.
კომენტარები