საჭიროა ზეწოლა რუსეთის თავდაცვით-სამრეწველო კომპლექსის ყველა სეგმენტზე – სანქციები უნდა გაფართოვდეს, – ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.
მისი თქმით, სწორედ ეს ზეწოლა შეუწყობს ხელს ხალხის წინააღმდეგ თავდასხმების რაოდენობის შემცირებას.
“მიმდინარე კვირაში თავდასხმების ქვეშ ჩვენი 16 რეგიონი მოექცა. რუსებმა 1 900-მდე დრონი, 1 600-მდე საჰაერო ბომბი და 144 სხვადასხვა ტიპის რაკეტა, მათ შორის ბალისტიკური რაკეტები, გაუშვეს. სუმის ოლქი საჰაერო ბომბებით დაიბომბა. ბროვარში, დრონის დარტყმის შედეგად ერთი ადამიანი დაიღუპა, ექვსი კი დაშავდა. ამასთან, ხარკოვი და ხარკოვის ოლქი მუდმივი თავდასხმის ქვეშაა. ღამით რუსეთმა ასევე დაბომბა ოდესის, ზაპოროჟიეს და დნიპროს ოლქები. თავდასხმების შედეგად მიმდინარე კვირაში 1 500-ზე მეტი ობიექტი დაზიანდა, მათ შორის ასობით საცხოვრებელი შენობა.
რუსული საწარმოების მნიშვნელოვანი რაოდენობა, რომლებიც ამ თავდასხმების მხარდაჭერაზე მუშაობენ დრონების, რაკეტების და მართვადი საჰაერო ბომბების კომპონენტების წარმოებით, ჯერ კიდევ არ არის სანქცირებული. სწორედ ამიტომ, აგრესორი სულ უფრო მეტს დებს ბალისტიკური იარაღის შესაძლებლობებში და ცდილობს წარმოების გაზრდას. საჭიროა ზეწოლა რუსეთის თავდაცვით-სამრეწველო კომპლექსის ყველა სეგმენტზე და სწორედ ეს ზეწოლა შეუწყობს ხელს ჩვენი ხალხის წინააღმდეგ თავდასხმების რაოდენობის შემცირებას. სანქციები უნდა გაფართოვდეს და უნდა იმუშაოს“, – წერს ზელენსკი.
კომენტარები