“ვისაც სააკაშვილის განცხადების შეეშინდა…” – გოჩა მირცხულავა

ჟურნალისტი, გოჩა მირცხულავა:

ცუდ დღეშია ქვეყანა… ვისაც სააკაშვილის განცხადების შეეშინდა, სადაც მან ნელსონ მანდელას ანალოგია მოიყვანა, უმჯობესი იქნებოდა, ჯერ ნათქვამის კონტექსტი გაეაზრებინა და შემდეგ საქართველოს კონსტიტუციაში ჩაეხედა. პოლიტიკური ლიდერის ფუნქცია გამარჯვებაა. ოპოზიციური ლიდერი სწორედ იმისთვის არსებობს, რომ იბრძოლოს ხელისუფლების შეცვლისთვის, საკუთარ გუნდს გამარჯვების რწმენა მისცეს და საზოგადოებას უთხრას, რომ ხელისუფლებაში მოვა. ამაში არც პოლიტიკური და არც სამართლებრივი სენსაცია არ არსებობს.
სააკაშვილმა იქვე თავად განმარტა:„ჩემი ფუნქცია არ არის ჩემი ხელისუფლებაში მოსვლა. ჩემი ფუნქციაა, ჩემთან ერთად მოვიყვანოთ სრულიად ახალი თაობა, სხვანაირად მოაზროვნე ადამიანები.“
ანუ საუბარია პოლიტიკური გუნდის გამარჯვებასა და ხელისუფლებაში ახალი ადამიანების მოყვანაზე და არა იმაზე, რომ მოქმედი სამართლებრივი სტატუსით სააკაშვილი აუცილებლად თავად დაიკავებს რომელიმე კონკრეტულ თანამდებობას. როგორც უკრაინის მოქალაქეს, მას შეუძლია მონაწილეობდეს საზოგადოებრივ-პოლიტიკურ პროცესში – გამოთქვას პოზიცია, მიმართოს საზოგადოებას, მხარი დაუჭიროს პოლიტიკურ გუნდს და გავლენა მოახდინოს პოლიტიკურ დისკუსიაზე. თუმცა ფორმალური პოლიტიკური უფლებები – არჩევნებში მონაწილეობა, პარტიის წევრობა და საჯარო პოლიტიკური თანამდებობის დაკავება – საქართველოს მოქალაქეობასთან არის დაკავშირებული.
დღევანდელი სტატუსით სააკაშვილი ვერ გახდება პარლამენტის წევრი, პრეზიდენტი ან პრემიერ-მინისტრი. უფრო მეტიც, მოქმედი კონსტიტუციით პრემიერ-მინისტრის, პრეზიდენტისა და პარლამენტის თავმჯდომარის თანამდებობა არ შეიძლება ეკავოს საქართველოს მოქალაქესაც კი, თუ ის იმავდროულად სხვა სახელმწიფოს მოქალაქეა.
ასე რომ, სააკაშვილი კანონს არ აცდენია. მან პოლიტიკური გამარჯვება და საკუთარი გუნდის ხელისუფლებაში მოსვლა დააანონსა, ხოლო გარეთ პანიკა შექმნეს ადამიანებმა, რომლებმაც ვერც ნათქვამის კონტექსტი გაიგეს და არც კონსტიტუციის მოთხოვნები იციან. ან გაიგეს დ ინტერპრეტინენ რომ
უკრაინის მოქალაქე ხელისუფლების ხელში ჩაგდებას ცდილობს.
მართლა ცუდ დღეშია ქვეყანა ასეთი პოლიტიკოსების თუ ამომრჩევლების ხელში – ადამიანების, რომლებიც ელემენტარული გააზრების მიღმა მსჯელობენ, იურიდიული ცოდნის ნაცვლად კი საზოგადოებას პანიკასა და იაფფასიან ინტრიგას სთავაზობენ.

“მე გამოვალ ამ ციხიდან, როგორც გამოვიდა ნელსონ მანდელა და პირდაპირ მოვიდა ხელისუფლებაში” – სააკაშვილი