ეროვნული ბანკის ყოფილი პრეზიდენტი, გიორგი ქადაგიძე:
“ჩემი აზრი 2024 წლის არჩევნების შესახებ ასეთია:
ბიძინას მხარეს არის უზარმაზარი ფინანსური რესურსი, რუსეთი, კრიმინალური სამყარო, სასამართლო და ქვეყნის ყველა ინსტიტუტი, პოლიტიკური პოლიცია (სუსი), მისი მოკავშირე უკიდურესი სიღარიბე, სსიპ-ებში გაფორმებული ხელფასიანი პარტაქტივი და 5-10% იანი პრორუსულად განწყობილი ელექტორატი.
ვინც ფიქრობს, რომ ამ ვითარებაში არჩევნები იქნება თავისუფალი და სამართლიანი, შეუძლია ამ პოსტის კითხვა აქ შეწყვიტოს.
“არჩევნებად” წოდებულ შიდა ომს კი, კონვენციური და პოლიტიკის წიგნებში ამოკითხული საარჩევნო სტრატეგიებით ვერ მოიგებ.
ჩვენი პირველადი ამოცანაა ჯერ თავისუფალი და სამართლიანი არჩევნების ჩატარების უფლება მოვიპოვოთ. ამისთვის სამი ძირითადი რეფორმაა საჭირო:
პირველი, ელექტრონული არჩევნები, რომელიც შედეგებს მყისიერად გვამცნობს და სხვა სიკეთეებთან ერთად, ახალგაზრდების მნიშვნელოვან ჩართულობას უზრუნველყოფს (იხ. ესტონეთის მაგალითი).
მეორე, ასი ათასობით ემიგრაციაში მყოფი ჩვენი მოქალაქის ჩართულობის უზრუნვეყოფა (ვადაგასული პასპორტების განახლებით, ახალი უბნების დამატებით, დისტანციური ხმის მიცემით და ა.შ.), რაც მნიშვნელოვან გავლენას ახდენს შედეგზე (იხ. მოლდავეთის მაგალითი).
მესამე, პოლიტიკური პოლიციის (სუსის) და პარტაქტივად გადაქცეული “კოორდინატორების” (სკოლების, გამგეობების და სხვა ადმინისრაციული რესურსის) გათიშვა საარჩევნო პროცესიდან.
სრულად პროდასავლური ოპოზიცია და პოლიტიკურად აქტიური მოქალაქეები უნდა გავერთიანდეთ ერთი იდეის გარშემო, მოვიპოვოთ და ჩავაბეტონოთ თავისუფალი/სამართლიანი არჩევნების უფლება. ასე ჩატარებული არჩევნებით მივიღებთ რეალურ ევროპულ კოალიციებს, ევროპულ წარმატებებს, კრიზისებზე პასუხისგებელ და გადამდგარ ხელისუფლებებს. მოკლედ, იმას, რასაც ევროპული დემოკრატია ქვია, ყველა თავისი სიკეთით.
ერთი ნომრის ქვეშ, წინასწარ დასახელებული კაბინეტი, რომელიც მანამდე ყველა ძირითად აქტორთან შეთანხმებულ საარჩევნო რეფორმას გაატარებს და დანიშნავს/ჩაატარებს რეალურ არჩევნებს 9-12 თვეში. სადაც, ვის როგორც უნდა, რანაირადაც უნდა, ისე მიიღებს მონაწილეობას, ხოლო ჩვენ საქართველოს მოქალაქენი, გადავწყვეტთ, ვის ვანდობთ ქვეყნის მართვას მომდევნო 4 წლით.
პ.ს. როგორც მანდელას ცნობილ სიტყვაშია “It always seems impossible until it’s done”.
კომენტარები