პოლიტოლოგი, დავით ზურაბიშვილი:
“ჩვენს ხელისუფლებას და მის პროპაგანდისტებს რომ ჰკითხო, ეს გლობალური ომის პარტია ამერიკას და ევროპას ხომ თავის ჭკუაზე ატრიალებს (ტრამპის და ორბანის გამოკლებით), რუსეთს ომს აწყებინებს უკრაინაში და მერე უკრაინას სისხლისგან ცლის ( რა მიზნითაც რვა წლის წინ იანუკოვიჩის ხელისუფლება დაამხო), მილიარდობით დოლარის იარაღს ასაღებს ზელენსკის ხელით, რევოლუციებს აწყობს სერბეთში, ეგვიპტეში, ლიბიაში, ტუნისში, ყირგიზეთში, ეკვადორში თუ ნიგერში, შვეიცარიის საბანკო სისტემას ანგრევს, წერილს არ აბეჭდინებს ბიძინა ივანიშვილს ევროპის არცერთ პრესტიჟულ გაზეთში და ა. შ. და ა. შ., მოკლედ პარტია კი არა იმხელა მონსტრია, მიმიქარავს ცხრათავიანი დევი და ამ დროს მაინცდამაინც საქართველოში წვალობს და ტილაობს: ხან კოჰაბიტაციას გვახვევს თავზე, ხან კვირიკაშვილს ლობირებს პრემიერად, ხან ხაზარაძეზე დებს ფსონს, ხან გახარიას უქმნის პარტიას, ხან აკერმანს გზავნის ბაკურიანში რევოლუციაში რომ დაატრენინგოს ოპოზიცია, ხან პრაიდებს აწყობს ლისის ტბაზე, ხან ვიქტორ ყიფიანი ჰყავს შეგზავნილი ბიძინასთან ადვოკატად, ხან კელიძეგნანს ნიშნავს ელჩად, ხან მიშა შემოჰყავს არაჟნის კონტეინერით, ახლა კიდევ ლომჯარიას აკეთებინებს ახალ პარტიას და ეს ყველაფერი იმისთვის, რომ ქართული ოცნება გაუშვას ხელისუფლებიდან და თავისი აგენტურა მოიყვანოს ნაცების სახით.
ჰოდა, ვისაც ყველაფერ ამისა მართლა გჯერათ, ცოტა იმაზეც ჩამოყალიბდით რა, რომ ეს გლობალური ომის პარტია მსოფლიო პროცესების წარმმართველი ყოვლისშემძლე მონსტრია თუ ქართული ოცნების გამოსირებული ოპონენტი, მრავალმილიარდიანი ფულადი და მრავალმილიონიანი ადამიანური რესურსებით ამდენ ხანს რომ ეჩალიჩება და ფეხებსაც ვერ ჭამს? ცოტა ტვინის უჯრედები გაატოკეთ თქვე სიძულვილით დაბრმავებულებო და დაყრუებულებო! მართლა რომ არსებობდეს ასეთი მძლავრი დაჯგუფება და მართლა რომ ნაცების მობრუნება ჰქონდეს მიზნად დასახული, როგორმე აქამდე ეყოლებოდით, რბილად რომ ვთქვა, წაღმა-უკუღმა გადახნული, თქვენი ჩარტერით თუ გლამურით და თქვენსავე ბუმბულსაც ვნახავდი გაშლილს, გაფანტულს ველადა!
მაგრამ სადაა გლობალური ომის პარტია და კაი ცხოვრება? საქმეც ისაა, რომ ყველანი ბედკრული საქართველოს შვილები ვართ.”
კომენტარები