ქართული ოცნების ერთ-ერთი ლიდერის გია ვოლსკის განცხადებით, ქართულმა მხარემ მოსამართლეების არჩევისას ვენეციის კომისიის რეკომენდაციების რაღაც ნიუანსები არ შეასრულა, თუმცა ეს ამბავი არც ისე დრამატულია:
“არის რაღაც ნიუანსები, რომელიც არაა ბოლომდე გათვალისწინებული. ვენეციის კომისიას რეკომენდაცია აქვს გაცემული გარკვეულ ნიუანსებზე, რომელიც არ შეასრულა ქართულმა მხარემ. ისინი იმედს გამოთქვამენ, რომ შემდეგი პარლამენტი, აი, ამ რამდენიმე ნიუანსს გაითვალისწინებს. მე ამ პროცესის დრამატიზებას არ მოვახდენდი”
შეგახსენებთ, რომ გუშინ ევროკავშირის საგარეო საქმეთა და უსაფრთხოების პოლიტიკის პრესმდივანმა გაავრცელა განცხადება და მოსამართლეების დანიშვნის პროცესს „ხელიდან გაშვებული შესაძლებლობა“ უწოდა, რადგან ხელისუფლებას შეეძლო საზოგადოების მეტი ნდობა მოეპოვებინა მართლმსაჯულების მიმართ
“სამწუხაროა, რომ პარლამენტი არ დაელოდა ვენეციის კომისიის ამ კანონმდებლობასთან დაკავშირებული გადაუდებელი მოსაზრების გამოქვეყნებას, რომელიც მან თავად მოითხოვა და რაც უახლოეს დღეებშია მოსალოდნელი. ეს არის საზოგადოებაში ამ პროცესის მიმართ მეტი ნდობის შექმნის დაკარგული შესაძლებლობა” – ნათქვამია განცხადებაში.
პარლამენტმა ბოლო პლენარულ სხდომაზე საერთო სასამართლოების შესახებ კანონში ცვლილებები დაამტკიცა – შეიცვალა უზენაესი სასამართლოს მოსამართლეების შერჩევის წესი.
კომენტარები