“ჭავჭავაძეზე გამომეკიდა უცხო მამაკაცი ყვირილით, თავი შევაფარე აფთიაქს, არავინ დამეხმარა” – მარიამ სანოგო

მოდელმა და ტელეწამყვანმა მარიამ სანოგომ The Talk show-ს ქართული ანალოგის ეთერში, რომლის თემაც ძალადობა იყო, პირად გამოცდილებაზე ისაუბრა და თქვა:

„ხშირად ვყოფილვარ ოჯახის გარეთ, საზოგადოების მხრიდან ძალადობის მსხვერპლი. არაერთი შემთხვევა მახსენდება, შემიძლია გავიხსენო როგორც ქალის, როგორც ფერადკანიან ქალის მიმართ ძალადობა. ყველაზე მეტად რის გამოც ვინერვიული, იყო ბავშვი. ჩემი შვილი იყო 2-3 თვის. დღისით, ქალაქის ერთ-ერთ ცენტრალურ ქუჩაზე, ჭავჭავაძეზე, გამომეკიდა უცხო მამაკაცი ჩხუბით და ყვირილით. თავი შევაფარე აფთიაქს. იქამდე არავინ დამეხმარა, სანამ აფთიაქში არ შევედი, მანამდე არავის ჰქონია რეაქცია. 

აფთიაქში გამომესარჩლა ქალი, რომელიც დაცვის თანამშრომელი იყო. პოლიციაშიც დავრეკე და მადლობა იმ თანამშრომელს, რომელმაც მყისიერად მოახდინა რეაგირება. სასამართლო პროცესიც გაიმართა. სათანადო დასჯა არის პირველი პრევენცია.

რამდენიმე დღის წინ მსგავს შემთხვევას შევესწარი და მე დავეხმარე გოგონას, რომელიც პარტნიორის მხრიდან იყო ფიზიკური ძალადობის მსხვერპლი. გამოვიძახეთ პატრული და აქაც იყო მყისიერი რეაგირება“