შსს ამტკიცებს, რომ მამაკაცი, რომელიც მანქანასთანაც კი არ მისულა ახლოს, ხელს უშლიდა პოლიციას -

589

შინაგან საქმეთა სამინისტრო, ამაღლების ქუჩაზე მომხდართან დაკავშირებით, განცხადებას ავრცელებს, სადაც ამტკიცებს, რომ მოპედის მღოლის გადამოწმება სურდათ, რა დროსაც, პოლიციას სიტყვიერი შეურაცხყოფა მიაყენა მსუბუქი ავტომობილის მძღოლმა, 1993 წელს დაბადებულმა პირმა. შსს–ს წერს, რომ ავტომობილის მძღოლს ნარკოტესტის ჩაბარება მოსთხოვეს, შემდგომ კი ადგილზე დააკავეს, რადგან, უარი განაცხადა ნარკოტესტზე.

ამის შემდეგ შსს წერს:

“ინციდენტის შემსწრე ერთ-ერთი გამვლელი პირი კი, სამართალდამცველებისთვის შესაბამისი სამართლებრივი ღონისძიებების გატარების პროცესში ხელის შეშლას შეეცადა, რა დროსაც გახდა შეუძლოდ.”

შსს წერს იმასაც, რომ თავი უნდა შევიკავოთ, რადგან შსს–ს დისკრედიტაცია ხდება, თუმცა, არ წერს, რა ტიპის ზიანი ადგება უწყებას, რომლის თანამშრომლებიც ქუჩაში ასე იქცევიან.

შსს არ წერს, თუ პოლიციელები კანონის მიხედვით მოქმედებდნენ, ამდენ ადამიანს, სხვადასხვა ასაკის ადამიანებს, როგორ გაუჩნდათ ერთნაირად პროტესტის გრძნობა?

შსს არ წერს იმასაც, როგორ უშლიდა ვინმეს დაკავებაში პენსიონერი მამაკაცი ხელს, როცა არც პოლიციის მანქანასთან, არც უშუალოდ ინციდენტის ადგილთანაც კი არ იყო ახლოს?

პენსიონერი კი, რომელსაც დღეს თავს დაესხნენ ქუჩაში, კომენტარში ამბობს:

“დავინახე, რომ ზემოდან მოდიოდა მსუბუქი მანქანა, უკან მოსდევდა პოლიცია, ასიგნალებდა, მერე რა მოხდა არვიცი, მაღაზიაში შევედი, ცუდად ვიყავი ძალიან, გამყიდველი მიცნობს, შეგიძლიათ უთხრა, წყალი მოვთხოვე, თავბრუ მეხვეოდა, დამაწყნარა, გადმოვედი ისევ გზაზე, ისევ იდგნენ ამ პატარა ბიჭს პოლიციელები ეჭიდავებოდნენ და ტენიდნენ მანქანაში. ვუთხარი, რატომ ეჩხუბებით-მეთქი, წყნარად ვუთხარი, კაცურად, არ უნდა ამას ჭიდაობა, თუ წინააღმდეგობა გაგიწიე, მერე რაც გინდა ის უქენი–მეთქი. შენ ვინ გეკითხებაო, მე ვუთხარი, მე კი არ მეკითხება შვილო, მე ხალხი ვარ-მეთქი და მოვა დრო და ასე თუ მოიქცევით, ეს ხალხი ყოფას გიტირებთ ყველას-თქო. ეს როგორც ვუთხარი, მითხრეს შემაგინეო, თურმე ყოფის ტირება და თუნდაც, დედის ტირება ყოფილა გინება, საშინელი შეურაცხყოფა. დამავლეს ხელი, დამიწყეს ჭიდაობა, მტენიდნენ მანქანაში და გავხდი ცუდად, წავიქეცი, მერე აღარ მახსოვს, მერე ხალხმა დამალევინა წამლები და მომიყვანა გონზე, ახლა მეუბნებიან, პოლიციაში უნდა წაგიყვანოთო. რატომ უნდა წავყვე? იმიტომ, რომ ასეთ ქვეყანაში ვცხოვრობთ? მითხარით, როგორ მოვიქცე???”