თამო კეშელავა
-ჯანდაცვის მინისტრის მოადგილემ გვითხრა, შეზღუდვებს არ მოაქვს გრძელვადიანი შედეგი და ამიტომ არ განვიხილავთ შეზღუდვების დაწესებასო – რამდენად სწორი გგონიათ ეს მიდგომა?
-შეზღუდვებს აღარ აქვს ეფექტი. კოვიდი არის აეროზოლური ინფექცია, არ არსებობს საქართველოში ადამიანი, რომელსაც კოვიდთან კონტაქტი არ ჰქონოდეს. გამორიცხულია. ერთხელ თუ იმგზავრა ადამიანმა ავტობუსით ან მეტროთი, იმას უკვე კოვიდთან ჰქონდა კონტაქტი, გამორიცხულია, რომ არ ჰქონოდა, შეიძლება არ დაავადდა, არ მიიღო კოვიდი, მაგრამ რაღაც კონტაქტი უკვე არსებობდა, ლორწოვანმა ეს „დაარეგისტრირა“ უკვე. ყველამ იცის უკვე, რომ ვიღაცასთან მაინც იქნებოდა კონტაქტში. ამ ხალხს ვეღარ შეაშინებ – გეტყვის, რა იცი, რომ უკვე არ მქონდა? იქნება, მქონდა? მაგალითად, ჩინეთში ახლა შეგიძლია იმოგზაურო ანტისხეულებზე ტესტის პასუხითაც – სულ ერთია, აცრილი ხარ, არა ხარ აცრილი, თუ გაქვს გადატანილი კოვიდი და გაქვს ანტისხეულები, შეგიძლია ჩინეთში იმოგზაურო ჩვეულებრივ. არ გეკითხება არავინ რანაირად გაქვს ანტისხეული მიღებული, მთავარია გაქვს ანტისხეული. ან გქონდა კოვიდი, ან გაქვს გაკეთებული ვაქცინა. გაქვს არჩევანი, ან მიაწოდო ანტისხეულებზე ტესტი, ან ვაქცინაციის ცნობა. ამ გზას ახლა მთელი აზია გადის. გერმანიაში 20 პროცენტი მოქალაქეების არ არის აცრილი და ის 20 პროცენტი არასოდეს აიცრება, წავიდა უკვე დრო, აღარ ეშინიათ, ამ ხალხს ახლა ვერაფერს მოუხერხებ. ერთადერთი გზაა ახლა, შეამოწმო მათ ანტისხეულები. შეზღუდვებზე უარის თქმა ნორმალურია, უკვე 2 წელი გადის პანდემიიდან და შეზღუდვებზე საუბარიც კი ზედმეტია.
საქართველოში რაც ყველაზე მეტადაა საგანგაშო და რაზეც ყველამ უნდა ვისაუბროთ ხმამაღლა – ესაა ჰიგიენა საავადმყოფოში და ავადმყოფის მოვლა – საავადმყოფო უნდა იყოს სრული ბარიერი ვირუსისთვის – იქ უნდა სუფევდეს უმკაცრესი ჰიგიენური რეჟიმი. საავადმყოფოს კარებში რომ შეხვალ, სხვა ქვეყანაში უნდა გეგონოს თავი, საავადმყოფოს ჰიგიენის და ავადმყოფის მოვლის საკითხი უმთავრესია, და მერე მოდის ვაქცინაციის საკითხი – იცით, რატომ? დღეს კორონაა, 2 წლის მერე შეიძლება სხვა ვირუსი იყოს, იმ საავადმყოფოში შენ ჰიგიენა და პაციენტის მოვლა ყოველთვის გჭირდება, ხან გექნება რაღაც ვირუსზე ვაქცინა და ხან არ გექნება, ამიტომაა ვაქცინა მეორე საფეხური. საავადმყოფოში რომ შედის ადამიანი, ის უნდა იყოს 100 პროცენტით დარწმუნებული, რომ იქ მისი ჯანმრთელობა საავადმყოფოს არაჰიგიენურობის გამო არ გაუარესდება. პერსონალისგან არ უნდა იღებდეს ვირუსს პაციენტი, მეორე სხვა პაციენტისგან არ უნდა მძიმდებოდეს. როცა რამდენიმე კორონიანს შეყრი ერთად, გამოკეტილში, ეს არის კატასტროფა, ყველა დამძიმდება, ახალგაზრდაც კი. გარდაცვალების კოეფიციენტი, შეიძლება, ისეთი მაღალი არ არის ჩვენთან, როგორც სხვა ქვეყნებში, მაგრამ ჩვენთან იღუპება ახალგაზრდა და ჯანმრთელი პაციენტიც, ასეთი ასაკის და ჯანმრთელი პაციენტი არც ერთ ნორმალურ ქვეყანაში აღარ იღუპება – ესაა ტრაგედია. ამიტომ, ყველას გთხოვთ, ერთად ვისაუბროთ საავადმყოფოს ჰიგიენაზე და ავადმყოფის მოვლაზე მეტი და მეტად ხმამაღლა. გისურვებთ ჯანმრთელობას.
კომენტარები