საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
15 ივნისის შეჯამება უკრაინაში:
– გუშინ რუსები იტყობინებოდნენ დონეცკის რაიონში ბოჰოროდიჩნე სრულად ავიღეთ და ცენტრალურ სლავიანსკი-იზიუმის გზაზე აღმოსავლეთიდან გავალთო. როგორც ჩანს ინფორმაცია მხოლოდ ნაწილობრივ იყო მართალი. რუსებმა ქალაქის ნაწილის დაკავება გუშინ მართლაც მოახერხეს, მაგრამ სრული კონტროლი და მით უფრო იმ გზის გასწვრივ პოზიციების დაკავება ნამდვილად არ მომხდარა, რომელიც სლავიანსკი-იზიუმის მაგისტრალს უერთდებოდა. დღეს დილით კი უკრაინელებმა კონტრშეტევის შემდეგ რუსების მიერ დაკავებული ტერიტორიების დიდი უმრავლესობა გაათავისუფლეს და რუსებს უკან დაახევინეს კიდეც სვიატოჰირსკის, შესაბამისად კი მდინარის მიმართულებით. თუმცა რუსები ბოჰოროდიჩნეს ჩრდილოეთიდანაც არიან მიმდგარები და რთული სათქმელია რა ხანგრძლივობით შეძლებენ უკრაინელები იმის შენარჩუნებას.
მიუხედავად უკრაინელთა დილის წარმატებისა, რუსები იზიუმიდან სამხრეთით, დოლინასთან მიახლოებას ცდილობენ და პირდაპირ იერიშს იზიუმი-სლავიანსკის M-03 გავლით ცდილობენ.
– სევეროდონეცკისათვის ბრძოლა გრძელდება. რუსები ტემპის დაგდებას არ აპირებენ და მზად არიან გაიღონ ძალიან დიდი მსხვერპლი და მაინც წაწიონ წინ, თუმცა უკვე მესამე დღეა ქალაქის სამხრეთ რაიონებში შეღწევა ძალიან უჭირთ. ამასთან, უკრაინული არტილერია მაღალი სიზუსტით ბომბავს რუსულ ნაწილებს სევროდონეკცში და მის ირგვლივ. რუსული საარტილერიო ნაწილები, რომლებიც უკრაინული პოზიციების წინააღმდეგ მუშაობდა უკრაინულმა არტილერიამ გაანადგურა.
სევეროდონეცკში აქტიურადაა ჩართული ქართული ლეგიონიც. უკრაინელები მათ მოქმედება ძალიან მაღალ შეფასებას აძლევენ. პრაქტიკულად, ქალაქის რიგი ნაწილის დაცვა სწორედ მათი მეშვეობით ხორციელდება.
– უკრაინელები სამხრეთის მიმართულებით, ზაპორიჟიას რაიონში რამდენიმე რუსული ტანკისა და საარტილერიო დანადგარის ხელში ჩაგდების შესახებ იტყობინებიან. მძიმე ტექნიკის თვალსაზრისით რუსული ნაწილები რომ ავსებენ უკრაინელებს მგონი ასეთი სისწრაფით ვერავინ ახერხებს.
– დღეს აფეთქების ხმა ისმოდა რუსეთში, ბელგოროდის რაიონში, ყირიმში სიმფეროპოლთან ძალიან ახლოს და ხერსონთან, სადაც ერთ-ერთი სამეთაურო პუნქტია განადგურებული.
– რამშტაინის სამხედრო ბაზაზე გერმანიაში კიდევ ერთი შეხვედრა გაიმართა და მომდევნო საათებშიც გაგრძელდება ის სხვადასხვა ფორმატში. შეხვედრის წინ დაანონსდა რომ აშშ კიდევ 1 მილიარდი დოლარის სამხედრო დახმარებას გაუწევს უკრაინას – ლენდ ლიზის მიღმა.
– ნატოს მადრიდის სამიტზე ფინეთისა და შვედეთის გვერდით საქართველოსა და უკრაინის მთავრობის წარმომადგენლებიც არიან მიწვეულები. სამიტი 29-30 ივნისს გაიმართება.
კომენტარები