პარიზში, მარსელსა და სხვა ქალაქებში შაბათს გამართული საპროტესტო აქციების დროს მომიტინგეებსა და სამართალდამცავებს შორის შეტაკებები მოხდა.
საფრანგეთის შინაგან საქმეთა მინისტრმა, ლორან ნუნიესმა განაცხადა, რომ ქვეყნის მასშტაბით გამართულმა 150-მდე აქციამ მშვიდობიანად ჩაიარა, თუმცა აქციების დასასრულს პოლიცია ზოგიერთი მონაწილის მხრიდან უჩვეულოდ მაღალი დონის ძალადობის წინაშე აღმოჩნდა.
მისი თქმით, პარიზში არეულობის ჩახშობაზე პასუხისმგებელ ერთ-ერთ პოლიციელს „მოლოტოვის კოქტეილი“ მოხვდა; მინისტრმა მომხდარი მკვლელობის მცდელობად შეაფასა.
შინაგან საქმეთა სამინისტროს ინფორმაციით, ქვეყნის მასშტაბით გამართულ აქციებში დაახლოებით 320 000-მა ადამიანმა მიიღო მონაწილეობა, მათ შორის 70 000 ადამიანი პარიზში შეიკრიბა; ისინი ქალაქის ცენტრს მოერიდნენ და მსვლელობა სამხრეთ-აღმოსავლეთ გარეუბნების ბულვარების გასწვრივ გამართეს. უწყების ინფორმაციით, პოლიციამ ქვეყნის მასშტაბით 565 ადამიანი დააკავა. პარიზში დაშავდა პოლიციის ოთხი თანამშრომელი და ერთი ჟანდარმი.
კვირის დასაწყისში ნუნიესმა განაცხადა, რომ საპროტესტო აქციებზე უსაფრთხოების უზრუნველყოფის მიზნით 70 000 პოლიციელი და ჟანდარმი, მათ შორის ელიტური დანაყოფები, განლაგდებოდა.
ცნობისთვის, საფრანგეთში შაბათს საპროტესტო აქციების მესამე ტალღა გაიმართა, რომლის მონაწილეებიც ცხოვრების ხარჯების ზრდასა და საჯარო მომსახურების ხარისხის გაუარესებას აპროტესტებდნენ.
კომენტარები