ფოტოკოლაჟში გამოყენებული ფოტო (მაისურის) – “რადიო თავისუფლება” / გიორგი ალადაშვილი
ახმეტაში 15 წლის მოზარდი პოლიციელებს ძალადობაში ადანაშაულებს. მოზარდის დედა ამბობს, რომ დაზიანებები ყელისა და ფეხის არეში აქვს მიყენებული.
როგორც მოზარდი ”რადიო თავისუფლებას” უყვება, შემთხვევა 11 ივლისს, ღამით, კულტურის სახლის მიმდებარე ტერიტორიაზე მოხდა.
მოზარდის თქმით, 15-მდე მეგობარი სეირნობდა, როდესაც მათთან პოლიციის 3 ჯგუფი მივიდა და ერთ-ერთი მეგობრის დაკავება დაიწყო. არასრულწლოვანმა პოლიციელებს მეგობრის დაკავების მიზეზი ჰკითხა, რის გამოც პოლიციელები ფიზიკურად გაუსწორდნენ.
“ჩემი ძმაკაცი რომ დააკავეს, მე ვიკითხე, რის საფუძველზე აკავებდნენ. პასუხი არ გამცეს… შემდეგ დამეჭიდნენ მაისურზე და რამდენჯერმე გამარტყეს. სამი ან ოთხი პოლიციელი მირტყამდა…ჯერ ცხვირში მომხვდა, ორი-სამი – სახეში და დანარჩენი – მუცლის არეში,” – აცხადებს მოზარდი “რადიო თავისუფლებასთან.”
არასრულწლოვანის თქმით, მომხდარის დაპირისპირების ამსახველი რამდენიმე ვიდეო არსებობს, რომელიც მისმა მეგობრებმა გადაიღეს.
არსებული ინფორმაციით, 15 წლის მოზარდზე პოლიციელების მხრიდან შესაძლო ძალადობის საქმის შესწავლა სპეციალურმა საგამოძიებო სამსახურმა დაიწყო. შინაგან საქმეთა სამინისტროს თქმით კი, ადმინისტრაციულ სამართალდარღვევათა კოდექსის 166-ე და 173-ე მუხლებით გათვალისწინებული დანაშაულისთვის (წვრილანი ხულიგნობა, პოლიციელის კანონიერი ბრძანების დაუმორჩილებლობა) ერთი პირი დააკავეს.
კომენტარები