ინდოეთში კოვიდისგან გამოჯანმრთელებულ და გამოჯანმრთელების პროცესში მყოფ პაციენტებში, მუკორმიკოზის, ე.წ.„შავი სოკოს“ შემთხვევები ფიქსირდება.
მუმბაიში მოღვაწე თვალის ქირურგი, აქშაი ნაირი ამბობს, რომ მან ოპერაცია ჩაუტარა 25 წლის ქალს, რომელიც კოვიდისგან 3 კვირის წინ გამოჯანმრთელდა და რომელსაც მუკორმიკოზი განუვითარდა.
„თვალის ამოღება მომიწია, რათა მისი სიცოცხლე მეხსნა. სამწუხაროდ, ეს დაავადება ასეთია“,- ამბობს ნაირი.
მუკორმიკოზი საკმაოდ იშვიათი სოკოვანი დაავადებაა, რომელიც დაბალი იმუნური სისტემის მქონე ადამიანებში იჩენს თავს. მუკორმიკოზს ობის სოკოები იწვევენ, რომლებიც ნიადაგში, მცენარეებში, სასუქში, ხილსა და ბოსტნეულში გვხვდება. ინფექცია თვალებს, ყურსა და ზოგჯერ ადამიანს ტვინსაც აზიანებს. სიცოცხლისთვის საშიშია განსაკუთრებით იმ შემთხვევაში, თუ შეხვდებათ დიაბეტით დაავადებულებს, აივ ინფიცირებულებს, ან ადამიანებს, რომლებიც სიმსივნეს ებრძვიან. როგორც ჩანს, ის კორონავირუსის შემდეგაც, დასუსტებული ორგანიზმისთვის, საშიშია.
სიმტომები: ცხვირიდან სისხლდება, თვალების შეშუპება და ტკივილი, დაწეული ქუთუთოები, მხედველობის გაუარესება და შემდეგ დაკარგვა.
ექიმების აზრით, მუკორმიკოზის შემთხვევები, შესაძლოა, სტეროიდული მედიკამენტების მოხმარებით იყოს გამოწვეული, რომელსაც კორონავირუსის შემთხვევაში, მძიმე და კრიტიკულად მძიმე პაციენტების სამკურნალოდ იყენებენ. სტეროიდული მედიკამენტები კოვიდის დროს ფილტვებში ანთებით პროცესსა და ზიანს ამცირებენ, მაგრამ ისინი ასუსტებენ იმუნიტეტს და სისხლში შაქრის დონეს ზრდიან.
დეკემბრიდან თებერვლამდე პერიოდში, ინდოეთის 5 ქალაქში, მუკორმიკოზის 58 შემთხვევა გამოვლინდა. მათ უმრავლესობას ინფექცია კორონავირუსისგან გამოჯანმრთელებიდან 12-15 დღის შუალედში განუვითარდა.
ექიმების თქმით, გასულ წელს 800 დიაბეტის მქონე კოვიდ პაციენტს უმკურნალეს, თუმცა სოკოვანი ინფექცია არცერთ მათგანს არ განვითარებია.
მუმბაიში მცხოვრები დიაბეტოლოგის, რაჰულ ბაქსის განცხადებით, მუკორმიკოზის თავიდან არიდების ერთ-ერთი გზა კოვიდ პაციენტების მკურნალობისა და გამოჯანმრთელების შემდეგ სტეროიდული მედიკამენტების დოზისა და ხანგძლივობის და ასევე სისხლში შაქრის რაოდენობის კონტროლია.
წყარო – BBC
კომენტარები