“სააკაშვილმა ამ საქმეს „პიჯაკების საქმე“ დაარქვა, და არა, ვთქვათ „ბოტოქსების“, პიჯაკი უნდა იყიდო, მაგრამ…” – ვოლსკი

პარლამენტის პირველმა ვიცე-სპიკერმა, გია ვოლსკიმ, ჟურნალისტებთან, განაცხადა:

“სახელმწიფო თანხების გაფლანგვის საქმეს თუ გრიფი „საიდუმლო“ მოეხსნება, ეს მიხეილ სააკაშვილის დაცვის მხარისთვის უფრო ხელსაყრელი რატომ არის, ან გრიფი „საიდუმლო“ რაღას ადევს, როცა ამ საქმეში არსებული ყველა ციფრი ვიცით?

ეს ყველაფერი მიხეილ სააკაშვილმა თავად მოიგონა, რომ დანაშაული შეამციროს და პროპაგანდისტური თვალსაზრისით ამ საქმეს „პიჯაკების საქმე“ დაარქვა, ვიდრე ვთქვათ, „ბოტოქსების“, რაშიც განსაკუთრებით დიდი თანხებია დახარჯული. რასაკვირველია, პიჯაკი უნდა იყიდო და წარმომადგებლობითი ხარჯები გქონდეს, მაგრამ ეს ხარჯები გაწერილი არ უნდა გქონდეს პირადი ექიმისთვის, შვილისთვის და გერმანიაში სამოგზაუროდ“

 მიხეილ სააკაშვილი ღია წერილით მიმართავს სალომე ზურაბიშვილს და ითხოვს, რომ სახელმწიფო დაცვის სპეციალური სამსახურის მიერ პრეზიდენტის ადმინისტრაციისთვის 2013 წელს და შემდგომ პერიოდში გაწეულ ხარჯებს გრიფი „საიდუმლო“ მოეხსნას.