ელგუჯა ცომაია, მამა-შვილი წოწორიები და გიორგი ნარიმანიძე სასამართლო დარბაზიდან გათავისუფლდნენ. მიხეილ სააკაშვილის მიერ საქართველოს საზღვრის გადმოკვეთაში დახმარების ფაქტზე დაკავებული 4 ბრალდებულის პროცესი გრძელდება. საქალაქო სასამართლო ელგუჯა ცომაიას, მამა-შვილი წოწორიების და გიორგი ნარიმანიძის საქმეზე მსჯელობს.
საქალაქო სასამართლოს ტერიტორია ოთხივემ დატოვა, თუმცა მედიასთან ვრცელი კომენტარისგან თავი შეიკავეს.
“ვნერვიულობ, მაცადეთ, არაფერს არ გეტყვით, იქნება მაგის დროც,” – განაცხადა ელგუჯა ცომაიამ.
როგორც საქმის პროკურორმა ლევან ვეფხვაძემ ჟურნალისტებს განუცხადა, დაცვის მხარემ ბრალდების მხარის ყველა მტკიცებულება უდაოდ გახადა და შესაბამისად, აქვს მოლოდინი, რომ საბოლოოდ, მოსამართლე ოთხივე ბრალდებულის მიმართ გამამტყუნებელ განაჩენს გამოიტანს.
“იმის გათვალისწინებით, რომ ბრალდების მხარის ყველა მტკიცებულება დაცვის მხარემ უდაო გახადა, ეს არის ერთ-ერთი მნიშვნელოვანი ახალი გარემოება და გვაქვს მოლოდინი, რომ მოსამართლე ოთხივე პირის მიმართ გამამტყუნებელ განაჩენს გამოიტანს”, – განუცხადა ტელეკომპანია პირველს საქმის პროკურორმა ლევან ვეფხვაძემ.
მამა-შვილ წოწორიებს, გიორგი ნარიმანიძეს და ელგუჯა ცომაიას სასამართლომ გირაოს სახით 5000-5000-ლარიანი გირაო შეუფარდა.
ცნობისთვის, სისხლის სამართლებრივი დევნაა დაწყებული შინაგან საქმეთა ყოფილი მინისტრის ყოფილი მოადგილის, გიორგი ლორთქიფანიძის მიმართაც.
კომენტარები