“სააკაშვილი მანამდე არ შეწყვეტს შიმშილობას, ვიდრე არ შეაფასებს გამოდნება თუ არა რევოლუცია მისი და ენმ-ს მიერ აგორებული ტალღისგან” – ანალიტიკოსი

ანალიტიკოსი, ზაალ ანჯაფარიძე სოციალურ ქსელში საქართველოს მესამე პრეზიდენტის, მიხეილ სააკაშვილის შიმშილობასთან დაკავშირებით პოსტს აქვეყნებს.

როგორც ანალიტიკოსი წერს, ექსპრეზიდენტი შიმშილობას მანამ არ შეწყვეტს, სანამ ის არ შეაფასებს რამდენად გამოუვათ თუ არა ქვეყანაში “ნაცმოძრაობის” წარმომადგენლებს რევოლუციის მოწყობა.

ამასთან, მისივე თქმით, თუ ოპოზიციური სპექტრი ნახავს, რომ რევოლუციის მოწყობა არ გამოდის, მაშინ შიმშილობის შეწყვეტის “ლამაზ” ფორმებსაც მოიფიქრებენ.

“სააკაშვილი მანამდე არ შეწყვეტს შიმშილობას, ვიდრე არ შეხედავს და შეაფასებს გამოდნება თუ არა რევოლუცია მისი და ენმ-ს მიერ აგორებული ტალღისგან.

თუკი ნახავენ, რომ არაფერი გამოდის, შიმშილობის “ლამაზად” შეწყვეტის მიზეზებსაც მოიფიქრებენ და მთელი ეს შემადგენლობა თანდათან აიხვეტება, როგორც არაერთხელ მომხდარა. უკრაინაში ექსტრადირების საკითხიც შემთხვევით არ გააქტიურებულა ხელახლა.

ეხლა მიდის ნერვების ომი და ინტელექტის ომი, თუ ვინ დაუშვებს და/ან ვის დააშვებინებენ შეცდომას.

არაერთი ქვეყნის მაგალითმა დაგვანახა, რომ ნებისმიერ რევოლუციაზე, თუნდაც ძალიან კარგად მომზადებულზე და დაფინანსებულზე, არსებობს ანტიდოტი.

რა თქმა უნდა, საქართველო როგორც ევროკავშირის და NATO-ს ასპირანტი ქვეყანა ზოგიერთ “ანტიდოტს” ვერ და არ გამოიყენებს და სწორედ აქ არის ძაღლის თავი დამარხული,” – წერს ზაალ ანჯაფარიძე.

ცნობისთვის, საქართველოს მესამე პრეზიდენტი მიხეილ სააკაშვილი პირველ ოქტომბერს დააკავეს. ის რუსთავის მე-12 პენიტენციურ დაწესებეულებაში უკვე 35-ე დღეა რაც შიმშილობს.