“რუსული არმიის ავანგარდმა მიაღწია ბახმუტი-ლისიჩანსკის გზას და მისი გადაკეტვა სცადა, თუმცა…” – გიორგი კობერიძე

– ბრძოლა სევერდონეცკისათვის გრძელდება. უკრაინის პრეზიდენტმა განაცხადა, რომ ქალაქის დათმობას უკრაინელები არ აპირებენ. სევეროდონეცკის აბსოლუტურ უმრავლესობას უკრაინელები აკონტროლებენ. დღეს ქალაქში მექანიზებული ბრიგადაც შევიდა. საბრძოლო მოქმედებები ქალაქის ცენტრს გაცდა და აღმოსავლეთით, გარეუბნებისაკენ გრძელდება. ამასთან ზურგში ალყაში მოქცეული რუსული ნაწილები ინდუსტრიულ რაიონში გაანადგურეს.

ქალაქში შევიდა ქართული ლეგიონიც.

– უკრაინელებმა წამოიწყეს ფლანგური შეტევა ქალაქის სამხრეთითაც. მხოლოდ სევეროდონეცკის დაკავება ფლანგური შეტევის გარეშე საშიში იქნებოდა. სწორედ ამიტომ სევეროდონეცკიდან 4 კილომეტრში უკრაინელებმა რუსებს კიდევ უფრო უკან დაახევინეს ტყიან მასივში, სოფელი ვორონოვეს მოშორებით.

რუსებს ქალაქის ირგვლივ ძირითადად შემტევი ნაწილები ჰყავთ თავმოყრილი, რის გამოც თავდაცვის ზღუდეები არსად არ აქვთ გაკეთებული. მათი უკან დახევა მასშტაბური უკან დახევაა და უკრაინელები ამ მდგომარეობის სრულად გამოყენებას აპირებენ

სწორედ ამის გამო რუსებს მოუწევთ დამატებითი ნაწილების გადმოსროლა დონეცკისა და ხარკივის რაიონებიდან, რათა ჩამოშლის საფრთხის წინაშე არ დადგნენ.

რეალურად ქალაქისა და მისი შემოგარენის ირგვლივ სიტუაცია ძალიან მალე იცვლება.

– სევეროდონეცკიდან კიდევ უფრო სამხრეთით სოფელ ტოშკივკასთან უმძიმესი საბრძოლო მოქმედებები მიმდინარეობს. სოფლიდან ლისიჩანსკისაკენ მიდის გზა. უკრაინელებმა რუსებისა და სეპარატისტების ბატალიონის შეჩერება და საარტილერიო იერიშით მათი უკუგდება შეძლეს. სეპარატისტების ნაწილებმა დიდი დანაკარგებით დაიხიეს უკან. ისინი შექმნილ მძიმე მდგომარეობაზე ღიად წერენ.

– რუსული არმიის ავანგარდმა მიაღწია ბახმუტი-ლისიჩანსკის გზას და მისი გადაკეტვა სცადა ბილოჰორივკასთან თუმცა უკრაინელებმა სოფლის შენარჩუნება დაჯგუფების უკუგდება შეძლეს. მძიმე ბრძოლები გრძელდება გზის 15 კილომეტრიან მონაკვეთზე – იაკოვლიკა-სპირნეს ნაწილში. უკრაინელებისათვის ამ გზის შენარჩუნება სასიცოცხლოდ მნიშვნელოვანია ლისიჩანსკი-სევეროდონეცკის დასაცავად.

– რუსებმა ლიმანიდან და იზიუმიდან ერთდროულად სცადეს სლავიანსკისაკენ გაჭრა თუმცა მძიმე დანაკარგებით დაიხიეს უკან. როგორც ჩანს იზიუმიდან დაძრული რუსული დანაყოფები 35-ე არმიის განადგურების შემდგომ გამოიფიტა და ლიმანის დაჯგუფების იმედი უფრო აქვთ, რომელსაც რაიჰოროდოკთან, ოღონდ ჯერ კიდევ მდინარის აღმოსავლეთით უკრაინელები აკავებენ. პრაქტიკულად ბრძოლა კვლავ ლიმანის რკინიგზის სადგურიდან 3 კილომეტრში მიმდინარეობს.

ერთადერთი საფრთხე რაც იქმნება უკრაინელების ძალიან ღრმად შესვლაა ისე, რომ ფლანგები ჯერ კიდევ არ არის სრულად დაცული – იზიუმი-სლავიანკი და ბახმუტი-ლისიჩანსკის გზის მონაკვეთი უსაფრთხოების კუთხით ძალიან სერიოზული გამოწვევაა. რუსები უკრაინულ თავდაცვის ზღუდეს ბარვინკოვესა და მთავარ მაგისტრალთან ვერაფერს უხერხებენ, მაგრამ შემოვლის შემთხვევაში გარკვეული საფრთხეები შეიქმნება. ამისათვის რუსების იზიუმის დაჯგუფებას დიდი შევსება უნდა მიუვიდეს ოღონდ. თუმცა ფაქტია რომ ამ ეტაპზე ბარვინკოვეს გავლით ან ცენტრალური მაგისტრალის გამოყენებით იზიუმის დაჯგუფებამ სლავიანსკამდე ვერ მიაღწია.

მეორეს მხრივ ლისიჩანსკი-ბახმუტის მონაკვეთის დაცვა და უსაფრთხოების უზრუნველყოფა ძალიან რთულ ამოცანად რჩება.

– ზაპორიჟიას რაიონში რუსული ასეული შეტევისას ჩასაფრებაში მოჰყვა და თითქმის სრულად განადგურდა პოლოჰი-ჰულიაიპოლეს გზაზე.

– საარტილერიო ბრძოლა გრძელდება ქალაქი დონეცკის სიახლოვეს. რუსები მარიინკასა და განსაკუთრებით ავდიივკას ბომბავენ. ხოლო უკრაინელები რუსულ საცეცხლე პოზიციებს ესვრიან. საბრძოლო დუელის შუაგულში კი ქალაქი დონეცკია, რომელშიც ჭურვები ცვივა.

– უკრაინელებმა საბრძოლო მოქმედებებში სრულად ჩართეს პოლონელებისაგან მიღებული ტანკები და ნიდერლანდური (ამერიკული წარმოშობის) M113 ჯავშანტრანსპორტიორები. ახალი დანაყოფები ლუგანსკის რაიონის გათავისუფლებაში იღებენ მონაწილეობას.

– გერმანიამ დაიწყო რეალური ენერგო ალტერნატივის შექმნა – დამატებით 50 მილიარდ კუბური მეტრის გაზს გათხევადებულ მდგომარეობაში აშშ-საგან მიიღებენ.

– ბორის ჯონსონმა შიდა პოლიტიკური კრიზისის მიუხედავად დღეს განცხადება გააკეთა და აღნიშნა, რომ გულხელდაკრეფილი ჯდომას არ აპირებს, როდესაც აგრესორი მშვიდობიან ქვეყანას ანადგურებს. უკრაინა უმოკლეს ვადაში მიიღებს M270 ზალპური ცეცხლის რეაქტიულ სისტემას. “ჰაიმარსებთან” ერთად ეს ის იარაღია, რომელსაც რეალური ცვლილების შეტანა შეუძლია ომში.