საქართველოში არსებულ ვითარებასთან დაკავშირებით რუსეთის საგარეო დაზვერვის სამსახურის პრესცენტრი მორიგ განცხადებას ავრცელებს. ოკუპანტი ქვეყნის უწყება ირწმუნება, რომ ვაშინგტონი ცდილობს დაგეგმილ არჩევნებში ეუთოს დემოკრატიული ინსტიტუტებისა და ადამიანის უფლებათა ოფისის (ODIHR) მეშვეობით ჩაერიოს.
საგარეო დაზვერვის სამსახურში შემავალი მონაცემებით, აშშ-ის სახელმწიფო დეპარტამენტი ემზადება ახალი ინსტრუმენტის ასამოქმედებლად საქართველოში 26 ოქტომბრის საპარლამენტო არჩვენებში ჩასარევად, ვაშინგტონისთვის არახელსაყრელი, ამჟამად მმართველი პარტიის „ქართული ოცნებისთვის“ გამარჯვებაში ხელის შეშლის მიზნით, ამერიკელებმა მოილაპარაკეს ეუთო/ოდირის საქართველოს მიმართულების ხელმძღვანელობასთან „თანამშრომლობაზე, – ნათქვამია განცხადებაში.
მოსკოვი ამტკიცებს, რომ ეუთო/ოდირი არჩევნებამდე 10-20 დღით ადრე გეგმავს, შუალედური ანგარიში გამოქვეყნოს, თითქოს ქვეყანაში თავისუფალი და სამართლიანი არჩევნების ჩატარების შანსი არ არსებობს. რუსული დაზვერვა ამტკიცებს, რომ ვაშნგტონის მიზანია, საქართველოში ოპოზიციის ჩართულობით მასობრივი საპროტესტო აქციები მოაწყოს, რათა ხელისუფლების ძალადობრივი გზით მიტაცება მოხდეს.
ნების გამოხატვის პირველი შედეგების გამოქვეყნების შემდეგ, წარდგენილი იქნება დასკვნა საარჩევნო პროცესის დემოკრატიულ ნორმებთან შეუსაბამობის შესახებ. ვაშინგტონის ჩანაფიქრი ნათელია და აღარ იწვევს გაკვირვებას – მისცეს საქართველოს პროდასავლურ ოპოზიციას მიზეზი მასობრივი საპროტესტო აქციების გასაშვებად ქვეყანაში ძალისმიერი გზით ხელისუფლების მიტაცების მიზნით, – ნათქვამია რუსეთის საგარეო დაზვერვის სამსახურის განცხადებაში.
კომენტარები