როდის ველოდებით საქართველოში კორონავირუსის პიკს? – მინისტრის მოადგილე

კორონავირუსის ეპიდემიის პიკი შემთხვევის მატებიდან სავარაუდოდ მეშვიდე-მერვე კვირაში დაფიქსირდება, – ამის შესახებ ჯანდაცვის მინისტრის მოადგილემ, თამარ გაბუნიამ „დღის ქრონიკის ეთერში განაცხადა. მისივე თქმით, შესაძლოა ამ ეტაპზე შემთხვევების უმეტესობის მონიტორინგი ბინაზე ხდებოდეს.

„ამ ვირუსს სეზონური მიმდინარეობა, როგორც ვიცით, არ ახასიათებს და ისედაც ცოტა ვიცით ამ ვირუსის ქცევის შესახებ. აქაც ჩვენი მოდელირება ემყარება სხვა ქვეყნების გამოცდილებას და ასევე იმ სტანდარტულ ინსტრუმენტებს, რომელიც მოდელირებისთვის აქვს შემოთავაზებული ამერიკის დაავადებათა კონტროლის ცენტრებს და ამ და ამ მოდელირების საფუძველზე ჩვენ რამდენიმე სცენარი გვაქვს მომზადებული და დაახლოებით მეშვიდე-მერვე კვირაზე შემთხვევების გავრცელების მატებიდან შეიძლება ვივარაუდოთ პიკური გავრცელება. თუმცა, აქაც მინდა აღვნიშნო, რომ შემთხვევების დიდი ნაწილი, 80% არის მსუბუქი და საშუალო სიმძიმის და ბევრი ქვეყანა კორონავირუსის მართვას ახდენს ბინაზე“, – განაცხადა გაბუნიამ.

მისივე თქმით, ბინაზე მკურნალ პაციენტებს კონსულტაციას ოჯახის ექიმები გაუწევენ და ჯანდაცვის სამინისტროსთან უკვე ჩამოყალიბდა კლინიკური მმართველობის საბჭო თენგიზ ცერცვაძის ხელმძღვანელობით, რომელიც კონსულტაციებს გაუწევენ ექიმებს.