„რეალურად უმუშევრობა კი არა, დასაქმებულების რიცხვი მცირდება“ – რესან ქიქავა

„რეალურად უმუშევრობა კი არა, დასაქმებულების რაოდენობა მცირდება ქვეყანაში. შარშან უფრო მეტი ადამიანი მუშაობდა, ვიდრე მუშაობს წელს“, – ასე ეხმაურება „ექსპო-ჯორჯიას“ დირექტორი რესან ქიქავა მთავრობის ახალ გადაწყვეტილებას სოციალურად დაუცველების დასაქმების სახელმწიფო პროგრამის გაუქმებასთან დაკავშირებით.

შეგახსენებთ, სოციალურად დაუცველები საჯარო სამსახურებში შემწეობის 4 წლის განმავლობაში შენარჩუნების პარალელურად ვეღარ დასაქმდებიან.

როგორც რესან ქიქავამ „პალიტრანიუსისა“ და რადიო „პალიტრას“ გადაცემაში „საქმე“ განაცხადა, ქვეყანაში უმუშევრობის შემცირებაზე საუბარი შესაძლებელია მხოლოდ იმიტომ, რომ დასასაქმებელი პირების საქართველოდან გადინება ხდება.

„რეალურად უმუშევრობა კი არა, დასაქმებულების რაოდენობა მცირდება. ასეთი მოცემულობას გვაქვს. უფრო მეტი ადამიანი მუშაობდა შარშან, ვიდრე მუშაობს დღეს. უმუშევრობა შემცირდა ნიშნავს იმას, რომ ქვეყანაში სამუშაო ძალა არის ნაკლები. ქვეყნიდან ხდება გადინება ადამიანების, რეალური სამუშაო ძალის და უმუშევრობაც ამის კვალობაზე მცირდება. თუნდაც მათი სტატისტიკის მიხედვითაც, რომელსაც მე პირადად არანაირად არ ვენდობი. იმიტომ, რომ სამწუხაროდ, ჩვენ გვაქვს ერთი ვერტიკალი, ერთ ვერტიკალშია მოქცეული ხელისუფლება, სადაც არ არსებობს არანაირი ერთმანეთის შემოწმების და დამაბალანსებელი ინსტიტუტი. ასეთი ტიპის სახელმწიფოში ნებისმიერი სახის განცხადება და ინფორმაცია არის არასანდო. ემსახურება მხოლოდ ერთ ინტერესს და არა საზოგადო ინტერესს“, – აცხადებს რესან ქიქავა.