წუხელ ღამით, ქუთასში ნიკეას ქუჩაზე მცხოვრებმა მოქალაქემ სოციალურ ქსელში განათავსა ფოტო და დაწერა:
“არ მოხვიდეთ ჩემთან, ბოდიში, მაგრამ კარს ვერავის გავუღებ, რადგან დაფიქსირდა კორონა და მთელი კორპუსი კარანტინშია”
წუხელ ღამითვე და დღეს დილიდან “ალიას” უამრავმა ადამიანმა დაურეკა ქუთაისიდან. მოგვიანებით, “ალია” ესაუბრა ნიკეას ქუჩის მაცხოვრებლებს და თავად პოსტის ავტორსაც, რომლებმაც თქვეს, რომ ნამდვილად დაფიქსირდა შემთხვევა და ქალბატონი, რომელიც აეროპორტის თანამშრომელია და რომელსაც სიცხე ჰქონდა, გადაიყვანეს შეფუთული, თავად ექიმებიც სრულად ივნენ აღჭურვილნი.
“ალიამ” არაერთხელ მისწერა და დაურეკა ჯანმრთელობის სამინისტროს საზოგადოებასთან ურთიერთობის სამსახურს, მაგრამ არც მესიჯს და ზარს არ უპასუხეს.
13.40 საათზე აღნიშნული მასალა “ალიას” ვებ.გვერდზე განთავსდა.
ცოტა ხნის წინ “ალიას” დაუკავშირდა ადამიანი, რომელიც გვიყვება, რომ ის არის ამ კორპუსში მაცხოვრებელი აეროპორტის თანამშრომელი:
“მე ვარ ის აეროპორტის თანამშრომელი, მთელი ღამე ვმუშაობდი და დღეს დილის 9 საათზე მოვედი სახლში, დავიძინე რამდენიმე საათი და გამაღვიძა ზარებმა. უამრავი ადამიანი მირეკავს, დედაჩემმა დამირეკა, ყველა მკითხულობს. დედა ტიროდა კიდეც, ისე შეეშინდა.
არავინ არ ცხოვრობს სხვა ამ კორპუსში აეროპორტის თანამშრომელი, წუხელ მოსულა მართლა სასწრაფო და პოლიცია, გაზის გაჟონვა ყოფილა რომელიღაცა ბინაში და მაგიტომ. წაიყვანეს დედა-შვილი, რომლებიც უკვე სახლში არიან და კარგად არიან. ვინ თქვა, რომ 7 საათი იყვნენ ექიმები, ან შეფუთული წაიყვანესო? არც ამ ფოტოზე ჩანს შეფუთული ადამიანი ან სამედიცინო პერსონალი.
სიცრუეა ეს ინფორმაცია, არც სიცხე მქონია და არც არსად წავუყვანივარ. დილის ცხრა საათიდან მირეკავენ და ყველა ვინც მირეკავს შეშინებულია და შეწუხებული, ჩემი მოსახელე ცხოვრობს ბოლო სადარბაზოში და იმანაც დამირეკა – ჩემზე წერია, თუ შენზეო.”
ჩვენ არც პირველ წერილში მოგვიხსენიებია სახელი და არც ახლა ვაპირებთ, თუ ქალბატონი თავად არ გვთხოს.
“ალია” ისევ დაუკავშირდა იმ ადამიანებს, რომლებმაც თავდაპირველად ინფორმაცია მოგვაწოდეს, მათ ისევ იგივე გაიმეორეს და გვითხრეს ასევე, რომ რამდენიმე მეზობელი აფრთხილებს ხალხს, რომ ინფორმაცია არ უნდა გასაჯაროვდეს.
ჩვენ დილიდან გვწერს უამრავი მოქალაქე ქუთაისიდან, მათ შორის სხვადასხვა სამედიცინო ცენტრების პერსონალი და კიდევ ორ ფაქტზე გვიამბობს, რომელზედაც “ალია” ამ მომენტისთვის მუშაობს და მოგვიანებით მოგაწვდით.
და ბოლოს, კიდევ ერთხელ მოვუწოდებთ ჯანდაცვის სამინისტროს, იქონიოს საზოგადოებასთან მაქსიმალური კონტაქტი, იყოს ღია და გამჭირვალე, ისაუბროს თითოეულ შემთხვევაზე.
ალია
კომენტარები