“რამდენი რამ გადაიტანა ამ ქალმა, ტრაგედიები დაებედა” – როდის და სად დაკრძალავენ მსახიობის ვაჟს

მსახიობ ნანა ფაჩუაშვილის ვაჟს, თამაზ აფხაიძეს ხუთშაბათს, 27 თებერვალს, საბურთალოს სასაფლაოზე დაკრძალავენ.

აფხაიძის გამოსვენება სასაფლაოს ცენტრალურ შესასვლელთან მდებარე ამაღლების ტაძრიდან 15 საათზე შედგება. 55 წლის თამაზს მოსახელე მამის გვერდით დაკრძალავენ. 

თამაზი მსახიობს პირველი ქორწინებიდან ჰყავს. ნანა 19 წლის იყო, როდესაც დაქვრივდა, თავის ვაჟზე ორთვენახევრის ფეხმძიმე. მსახიობმა შვილს გარდაცვლილი მეუღლის სახელი დაარქვა.

თამაზს „პრაიმტაიმთან“ რუსთაველის თეატრის მსახიობი დავით კვირცხალია იხსენებს.

დავით კვირცხალია: – საშინელება დაემართა ნანას. რამდენი რამ აიტანა ამ ქალმა. ტრაგედიები დაებედა. თაზოს მამა არაჩვეულებრივი კაცი, ტრაგიკულად დაიღუპა, მეორე ქმარიც, ტრისტან ყველაიძეც (ჩემი უახლოესი მეგობარი) ახალგაზრდა წავიდა. ჩვენ, ერთი პერიოდი, ერთ ქუჩაზე ვცხოვრობდით, დოლიძელები გახლდით და თაზოს ძალიან კარგად ვიცნობდი. ნამდვილი ჯენტლმენი, რაინდული თვისებებით შემკული კაცი იყო, რომელიც არა მხოლოდ გარეგნულად, არამედ მანერებით გხიბლავდა. დახვეწილზე დახვეწილი კაცი იყო, მორიდებული ადამიანი. 

ამ ტრაგედიების მიუხედავად ნანა რუსთაველის თეატრში წამყვანი მსახიობი და ნამდვილი ვარსკვლავური თვისებების მატარებელი ქალია. ერთხელ ვერ ნახავ, რომ იტყვიან  – „საშინაოდ“ ან „ისე რა“ გამოწყობილს. სახლშიც კოპწია და აკურატულია. 

დიდ სამძიმარს ვუცხადებ ნანას და მის ქალიშვილს ხათუნას. დანაკარგს ვერაფერი დააბალანსებს. მტკივნეული სიცარიელე დარჩება.

თამაზ აფხაიძეს ორი კვირის წინ ტრეპანაცია ჩაუტარდა. 23 თებერვალს დილით, აფხაიძე ანევრიზმამ იმსხვერპლა.