დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ფინანსთა სამინისტროსთან მიღწეული შეთანხმების საფუძველზე ვაქცინაციის ღირებულება გაიზარდა:
„დღევანდელი მდგომარეობით, ორჯერადი აცრის ღირებულება 5 ლარია. მიღებულია გადაწყვეტილება, რომ ორჯერადი აცრის ღირებულება 10 ლარამდე გაიზარდოს“, – განაცხადა გამყრელიძემ.
მისი თქმით, ქვეყანაში 3 400 000 აცრა უნდა ჩატარდეს, რაც სრულად 34 მილიონი ლარი ეღირება. „იმუნიზაციის ბიუჯეტში გარკვეული თანხები გვაქვს“, – აღნიშნა გამყრელიძემ.
გამყრელიძის თქმით, დღეს ქვეყანაში ცრის 132 სამედიცინო დაწესებულება 250 ბრიგადით. ბრიგადაში შედის ექიმი, ექთანი და საინფორმაციო სისტემაში ადმინისტრატორი, რომელსაც შეჰყავს მონაცემები. მისივე განმარტებით, თითოეული ბრიგადის გამტარუნარიანობა 8-საათიანი გრაფიკის პირობებში არის დაახლოებით 60.
„დღეს რომ ეს 250 ბრიგადა ფუნქციონირებდეს სრულად, 7 დღისა და 8 საათის განმავლობაში ყოველდღიურად, მაშინ მათი გამტარუნარიანობა იქნება 15000-ზე მეტი აცრა დღიურად. დღესდღეობით ყველა ეს ბრიგადა არ ფუნქციონირებს 8 საათის განმავლობაში და ასევე ყოველდღიურად. ჩვენ ვაქცინების იმ რაოდენობის სრული ადმინისტრირებისთვის, რაც გვაქვს ივლისამდე, გვჭირდება დღეში დაახლოებით 6000 აცრა. დღეს საშუალოდ ასული ვართ დღეში 5000-მდე“
მისივე თქმით, ამცრელი ბრიგადების რაოდენობა 250-დან 400-დე უნდა გაიზარდოს. ამავე დროს ქვეყნის ოთხ ქალაქში – თბილისში, რუსთავში, ბათუმსა და ქუთაისში მოეწყობა დიდი ამცრელი სივრცეები.
“ამ თვის ბოლომდე უნდა ავიდეთ 400 ბრიგადამდე. ასევე 4 დიდ ქალაქში – თბილისში, ბათუმში, ქუთაისსა და რუსთავში უნდა ჩამოვაყალიბოთ დიდი ამცრელი სივრცეები. თბილისში მინიმუმ – 4, დანარჩენ ქალაქებში თითო-თითო.
კარვებზე არ არის ლაპარაკი, დასამალი არაფერია, ვმუშაობთ “ექსპო-ჯორჯიასთან”, ასევე “ჰუალინგთან”, რამდენიმე სპორტულ დაწესებულებასთან და სავაჭრო მოლებთან მათი სივრცეების გამოყენებაზე, რომ გაიშალოს ვაქცინაციის ცენტრები და ვაქცინა ივლისიდან ყველასთვის ხელმისაწვდომი იყოს”
კომენტარები