ტექნიკური უნივერსიტეტის რექტორის ინფორმაციით, მათი პროფესორ ოთარ გელაშვილი მიღებული დაზიანებების შედეგად გუშინ გარდაიცვალა. როგორც უმაღლესი სასწავლო დაწესებულების ხელმძღვანელი, მთავარ არხთან, ამბობს, გელაშვილი დაახლოებით 1 თვის წინ, ქვემო ქართლის რეგიონში იპოვეს, მას მძიმე დაზიანებები აღენიშნებოდა:
“1 თვის, 40 დღის წინ, ერთი დღე იყო საღამოს შვიდი საათიდან დილამდე მიუწვდომელი. შემდგომში ის იპოვეს რუსთავში, ქვემო ქართლის რეგიონში, იყო ძალიან მძიმე მოტეხილობებით. გაუკეთდა მას ოპერაცია რუსთავში, შემდეგ გადმოყვანილ იყო საუნივერსიტეტო კლინიკაში. ბატონ ოთარ გელაშვილი გარდაიცვალა გუშინ დილას…
ის გარდაიცვალა ცემის შედეგად მიყენებული დაზიანებებით.”
მისივე ინფორმაციით, გამოძიებას ერთი პირი დაკავებული ჰყავს, ხოლო მეორე მიიმალა და ქვეყანა დატოვა. რექტორი არ გამორიცხავს, რომ მომხდარი გელაშვილის ბიზნეს-საქმიანობას უკავშირდება და ამბობს, რომ გამოძიებაც სწორედ ამ კუთხით მუშაობს, თუმცა, არ აკონკრეტებს, საიდან აქვს ინფორმაცია, რომ მთავარი ვერსია სწორედ ბიზნეს საქმიანობაა.
“ეს არ უკავშირდება არც აკადემიურ და არც სამეცნიერო საქმიანობას. მეცნიერს აქვს უფლება ჰქონდეს პირადი ბიზნესი და შეიძლება ერთ-ერთ ბიზნესს უკავშირდება.
მთავარი ვერსია არის ეს. ” ამბობს სტუ-ს რექტორი.
მომხდარზე შსს-ს ოფიციალური განცხადება არ გაუვრცელებია.
წყარო – მთავარი არხი
კომენტარები