ჩეხეთის დედაქალაქის, პრაღის საქალაქო საბჭომ მიიღო გადაწყვეტილება, სიკვდილის შემდეგ ქალაქის საპატიო მოქალაქეობა ჩამოერთვას საბჭოთა მარშალს, ივან კონევს.
გადაწყვეტილება უნდა დაადასტუროს ქალაქის პარლამენტმა, რაც, როგორც ვარაუდობენ, უახლოეს ხანში მოხდება.
კონევმა პრაღის საპატიო მოქალაქეობა მიიღო 1945 წლის ივნისში, ის მეთაურობდა წითელი არმიის დანაყოფებს, რომლებიც პრაღაში 1945 წლის 9 მაისს შევიდნენ.
კონევისთვის საპატიო მოქალაქეობის ჩამორთმევის ინიციატივით გამოვიდა ქალაქის მერი ზდენეკ გრჟიბი, გადაწყვეტილების დასაბუთებაში ნათქვამია, რომ 1945 წლის მოვლენები უნდა განხილული იყოს ისტორიულ კონტექსტში. დოკუმენტში ვკითხულობთ, რომ კონევმა 9 მაისს გასცა ბრძანება დაებომბათ ქალაქი მლადა-ბოლესლავი, რათა არ დაეშვათ გერმანელების დასავლეთით გადინება. დაბომბვის დროს დაიღუპა ბევრი მშვიდობიანი მოსახლე. დოკუმენტში აღნიშნულია კონევის როლი ბუდაპეშტში 1956 წლის ამბოხების ჩახშობის პროცესშიც.
ამ დრომდე პრაღის საპატიო მოქალაქის წოდება ჩამორთმეული ჰქონდა სამ პირს: ჩეხოსლოვაკიის კომპარტიის ლიდერებს, კლემენტ გოტვალდსა და გუსტავ გუსაკს და საბჭოთა დიქტატორ სტალინს.
2020 წელს პრაღის მეექვსე რაიონის მესვეურებმა აიღეს კონევის ძეგლი, რომელიც 1980 წელს იყო აღმართული.
კომენტარები