ფლორიდის შტატის გუბერნატორის, რონ დესანტისის პრესსპიკერი კრისტინა პუშოუ, რომელიც საქართველოს ყოფილი პრეზიდენტის, მიხეილ სააკაშვილის ლობისტი იყო, უცხოელი პოლიტიკოსის აგენტად დაგვიანებით დარეგისტრირდა.
ამის შესახებ უცხოური გავლენიანი გამოცემა The Washington Post სტატიას აქვეყნებს სათაურით ” მიხეილ სააკაშვილის თეატრალური დაბრუნება საქართველოში”
The Washington Post წერს, რომ ფლორიდის გუბერნატორის პრესსპიკერი საქართველოს ყოფილი პრეზიდენტის მიხეილ სააკაშვილის უცხოელ აგენტად 6 ივნისს დარეგისტრირდა და მოგვიანებით გაასაჯაროვა იმ სამუშაოს დეტალები, რომლებსაც 2018-2020 წლებში პოლიტიკოსისთვის ასრულებდა.
პუშოუს ადვოკატის განცხადებით კი, ექსპრეზიდენტ მიხეილ სააკაშვილთან მისი მუშაობის გასაჯაროება იუსტიციის დეპარტამენტთან კონტაქტის შემდეგ მოხდა.
როგორც პეშოუს ადვოკატი მაიკლ შერვინი აცხადებს, კრისტინა პუშოუმ საქართველოში მუშაობა 2018 წელს მოხალისედ დაიწყო და საბოლოოდ ორი წლის განმავლობაში მას 25 ათასი დოლარი გადაუხადეს. პირველი გადახდა 10 ათასი დოლარის ოდენობით მან 2018 წლის ოქტომბერში ნაღდი ანგარიშსწორებით მიიღო. ის, ასევე, ექვსი კვირის განმავლობაში რჩებოდა თბილისში მიხეილ სააკაშვილთან დაახლოებული პირის კუთვნილ ბინაში.
„მისი ძალისხმევა მოიცავდა სტატიების წერას, მხარდამჭერებთან და ოფიციალურ პირებთან ურთიერთობას და მისი ინტერესების დაცვას საქართველოში და აშშ-ში. სამუშაო 2020 წელს დასრულდა, ქალბატონ პუშოუს ცოტა ხნის წინ იუსტიციის დეპარტამენტმა შეატყობინა, რომ ბატონი სააკაშვილის სახელით მისი სამუშაო სავარაუდოდ საჭიროებს უცხოელ აგენტად რეგისტრაციას. ქალბატონმა პუშოუმ შეიტანა უკანა ვადით რეგისტრაციის განაცხადი, როგორც კი ეს მისთვის ცნობილი გახდა“, – განაცხადა ადვოკატმა.
იუსტიციის დეპარტამენტს აღნიშნულ საკითხთან დაკავშირებით კომენტარი არ გაუკეთებია. კრისტინა პუშოუ ფლორიდის გუბერნატორის ოფისს 2021 წლის მაისში შეუერთდა.
The Washington Post წერს, რომ პუშოუ დესანტისის პრესმდივნად ერთწლიანი მუშაობის განმავლობაში თავისი უფროსის ცნობილ დამცველად და მედიის აქტიურ კრიტიკოსად იქცა. გასულ წელს „ტვიტერმა“ მას ანგარიში დაუბლოკა მას შემდეგ, რაც „ესოშიეთიდ პრესმა“ გაავრცელა ინფორმაცია, რომ კრისტინა პუშოუს მხრიდან ჟურნალისტის მისამართით კრიტიკის შემდეგ, რეპორტიორს მოკვლით ემუქრებოდნენ. კრისტინა პუშოუ სოციალურ მედიაში ღიად წერდა მიხეილ სააკაშვილისთვის მისი მუშაობის შესახებ, რომელიც გასულ წელს დაბრუნდა საქართველოში.
The Washington Post წერს ასევე, რომ საქართველოს სასამართლომ, რომელსაც ახლა სააკაშვილის პოლიტიკური ოპონენტები აკონტროლებენ, ის დაუსწრებლად 2018 წელს გაასამართლა. მას ემუქრებოდა დაპატიმრება სამი წლის შემდეგ, როდესაც ის თავის ქვეყანაში თეატრალურად დაბრუნდა.
კომენტარები