ლევან ჯავახიშვილი
„ალიას“ ესაუბრება ექსპერტი გია ხუხაშვილი.
– ბატონო გია, „ნაციონალებიც“ შევიდნენ პარლამენტი, ფაქტობრივრად, „ლეიბორისტების“ გარდა, ყველანი შევიდნენ. რა შეიცვლება ამით პოლიტიკაში და უშუალოდ, პარლამენტში?
– მე ვფიქრობ, რომ ამით დინამიკა მიეცემა ყველაფერს. პარლამენტი თავის ფუნქციას მაინც ვერ და არ შეასრულებს, რადგან ჩვენ უკვე შესულები ვართ საარჩევნო კამპანიის სტადიაში. პარლამენტიც უნდა იქნას განხილული, როგორც წინასაარჩევნო კამპანიის ნაწილი. ამიტომ პარლამენტი შემოდგომამდე სანახაობა იქნება, ვიდრე კანონშემოქმედებითი საქმიანობის ორგანო. ამ მხრივ „ნაცმოძრაობა“ ბევრად უფრო გააცოცხლებს და დინამიურს გახდის სიტუაციას, როგორც ის ოპოზიციური პარტიები, რომლებიც მანამდე შევიდნენ პარლამენტში.
– პარტიების დაფინასების შესახებ ახალ კანონს იღებს პარლამენტი. პარტიებს კანონით უნდა განუსაზღვრონ, რამდენი დეპუტატი შევა პარლამენტში. ეს, კანონით განსაზღვრული სავალდებული რაოდენობა თუ არ შევა, იმ პარტიებს სახელმწიფო დაფინანსებას შეუწყვეტენ. სახელმწიფო დაფინანსება ავტომატურად შეუწყდებათ იმ პარტიებს, რომლებიც საარჩევნო ბარიერს გადალახავენ და არ შევლენ პარლამენტში. ამაზე რას იტყვით?
– ეს არასამართლიანი კანონია. პარტიები იმიტომ კი არ ფინანსდებიან, რომ აუცილებლად პარლამენტში უნდა ისხდნენ. ფინანსდებიან, რადგან მათ ამომრჩეველთა კონკრეტულმა რაოდენობამ მისცა იმდენი ხმა, რომ კანონით დაიმსახურეს ეს სახელმწიფო დაფინანსება. ეს პარტიები კი ამ ხალხის, მათი ამომრჩევლის პოზიციას გამოხატავს. თუ ამ ადამიანებს, კონკრეტული პარტიის თუ პარტიების ამომრჩევლებს მიაჩნიათ და არ უნდათ, რომ ის პარტია, რომელსაც ხმა მისცეს, შევიდეს პარლამენტში, მაშინ არ უნდა შევიდეს. პარლამენტში არ შესვლა არ უნდა იყოს დაფინანსების შეწყვეტის საფუძველი. ეს ფული ხელისუფლებისა არ არის, იგივე იმ ხალხის ფულია, ვინც კონკრეტულ პარტიას ხმა მისცა და მას პარლამენტში არ შესვლა მოსთხოვა.
კომენტარები