ნიკა მელია თბილისის მერად? – როგორია ოპოზიციის სავარაუდო გეგმა?

გადამწყვეტი ბრძოლა თვითმმართველობის არჩევნებისთვის – „პირველების“ ინფორმაციით, ხელისუფლების მოწინააღმდეგეების სავარაუდო გეგმა ასეთია – დედალაქის მერად კენჭს ნიკა მელია იყრის, თუმცა ერთი პირობით, საარჩევნო კამპანია თავად უნდა დაგეგმოს. ასევე, ირკვევა, რომ თბილისის საკრებულოს თავმჯდომარეობისთვის ელენე ხოშტარია იბრძოლებს, ხოლო ზურა ჯაფარიძე ერთიანი ოპოზიციის სიით გავა. 

გეგმაზე ვერ თანხმდება პარლამენტში შესული ოპოზიციის ერთი ნაწილი- „ლელო“, „გირჩი“, ალეკო ელისაშვილის  „მოქალაქეები“ და  „სტრატეგია აღმაშენებელი“.

ჩვენ კონსულტაციებს გავმართავთ ყველა ოპოზიციურ პარტიასთან, რომლებიც მიიღებენ მონაწილეობას ადგილობრივ არჩევნებში მხოლოდ  და მხოლოდ ერთი მიზნის მისაღწევად: „ქართულმა ოცნებამ“ ვერ უნდა აიღოს 43% ადგილობრივ არჩევნებში. აუცილებელი არ არის ერთ კანდიდატურაზე შეჩერება, მთავარია, ჩვენს სტრატეგიულად იმ მიზანს არ ვუღალატოთ, რასაც ჰქვია რიგგარეშე არჩევნების მიღწევა, – აცხადებს „ლელოს“ ლიდერი, მამუკა ხაზარაძე.

ერთიანი კანდიდატის დასახელების აუცილებლობას ვერ ხედავს „სტრატეგია აღმაშენებელიც“. პარტიის წევრი, პაატა მანჯგალაძე, ამბობს, „ქართული ოცნების“ და ,,ენმ”-ს კანდიდატების გარდა, მესამე არჩევანიც უნდა არსებობდეს. 

ჩვენ არ შეგვიცვლია ჩვენი პოზიცია. გარდა „ნაციონალური მოძრაობისა“ და „ქართული ოცნების“ კანდიდატისა, უნდა არსებობდეს მესამე არჩევანიც, -ამბობს მანჯგალაძე. 

„მოქალაქეების“ ერთ-ერთი ლიდერი, ლევან იოსელიანი, კი ამბობს, რომ ოპოზიციასთან თანამშრომლის მწარე გამოცდილება აქვთ, რის გამოც არჩევნებზე დამოუკიდებლად მონაწილეობის გადაწყვეტილება მიიღეს. 

ოპოზიციასთან კოორდინაციის თვალსაზრისით იმდენად ცუდი გამოცდილება დაგვიგროვდა, რომ ამ არჩევნებზე ვამჯობინეთ, რომ დამოუკიდებლად მივიღოთ მონაწილეობა, –ამბობს ლევან იოსელიანი. 

რაც შეეხება მმართველ პარტიას, საკუთარ კანდიდატებს მომავალ კვირას „ქართული ოცნებაც“ დაასახელებს.