“მოსწავლეები ომს ხატავენ, გოგონები დედის სახეს, ბიჭები ტანკებს…” – უკრაინელ მასწავლებელს მხედველობა აღუდგინეს

რუსების მხრიდან ხარკოვის გარეუბნის აფეთქებისას წნევის ტალღამ ფანჯარა ჩაამსხვრია და ასობით შუშის ნამსხვრევები ოლენა კურილოს თვალსა და სხეულზე დარჩა. როდესაც სამედიცინო დახმარების მისაღებად მან შენობა დატოვა, ცნობილი ფოტო ამერიკელმა ფოტოგრაფმა, ვოლფანგ შვანმა გადაიღო,  ოლენას სისხლით შეღებილი სახე რუსეთის აგრესიის სიმბოლოდ იქცა,

 გავრცელებული ინფორმაციით, ოლენა კურილომ ოპერაციის შედეგად მხედველობა დაიბრუნა და ახლა პოლონეთში იმყოფება და  მოსწავლეებს ხელოვნებას ასწავლის. 

შემთხვევის შემდეგ, ოლენამ ქალაქგარეთ, ტყეში სარდაფს შეაფარა თავი, სადაც 12 დღე დაყო. “ვგრძნობდი აფეთქების ტალღებს. წასვლას ვერ ვბედავდი”. – ამბობს იგი. საბოლოოდ, სატვირთო მანქანის დახმარებით ხარკოვის ცენტრამდე მიაღწია, საიდანაც პოლონეთში მატარებლით გაემგზავრა. უკრაინაში დატოვა ქმარი, რათა პარალიზებული დედისთვის ყურადღება მიექცია.

პოლონეთში ქირურგებმა მისი დაზიანებული თვალი სილიკონის ზეთის ინიექციით ნაწილობრივ აღადგინეს. ახლა ის უკრაინელ ლტოლვილ ბავშვებს ხელოვნებას ასწავლის.

“ისინი ან ომს ხატავენ ან იმას, თუ როგორი იყო ომამდე მათი ცხოვრება: სახლს, დედას, მამას. გოგონები ძირითად დედის სახეს ხატავენ, ბიჭები კი ტანკებს”. – ამბობს ხელოვნების მასწავლებელი.