“მომწონს, რომ უნდა ვიყო ლაღი და სასაცილო – მივხედოთ ღვინოს და ლიტერატურას”

გიორგი შაქარაშვილის ბიძა, ადვოკატი, მირიან ნიკოლაძე, სოციალურ ქსელში, წერს:

როგორც ემიუელ ლენგჰორნ კლემენზი იტყოდა: “ჭორები ჩემი გარდაცვალების შესახებ მეტისმეტად გადამეტებულია”. კოვიდის ტესტმა უარყოფითი უჩვენა, თუმცა რამდენიმე დღით უნდა დავრჩე თვითიზოლაციაში უსაფრთხოების მიზნით.

ასე რომ, მივხედოთ ღვინოს და ლიტერატურას..

მიყვარს მარინა, მაგარი გოგოა, ამიტომ მოცალეობის ჟამს ცოტა მივაკორექტირე (მადლობა თვითიზოლაციას).

X X X

მ.ცვეტაევა

(თარგმანი მირიან ნიკოლაძისა)

რაღაცნაირად მომწონს, რომ არ გიჟდებით ჩემზე,

მეც რომ არ ვაფრენ დიდად, რაღაცნაირად მხიბლავს,

ორივე ისე ფრთხილად ჩავუვლით გრძნობებს გვერდზე,

რომ არ გვეცლება ფეხქვეშ ცოდვილი დედამიწა…

მომწონს, რომ უნდა ვიყო ლაღი და სასაცილო,

აღარ ვეძებდე სიტყვებს, რადგან არა აქვს აზრი

და ჩვენი შეხებისას თითქმის აღარც კი ვცდილობ

რამენაირად ვძლიო ვნებების ნიაღვარი…

იცით, რა მომწონს კიდევ? როცა სხვას ეფერებით

და მე ვუყურებ ამას, ჩემს თვალწინ ხდება თითქმის,

მეც რომ სხვას ვკოცნი ამ დროს, წყევლით და შეჩვენებით

ვიცი ვერ გამიმეტებთ, აუგს არასდროს იტყვით….

არ გამიხსენებთ ხშირად, რაც მე ძალიან მხიბლავს,

ჩემს ლამაზ სახელს თქვენთვის აღარ ექნება ფასი

არ დაგვადგამენ გვირგვინს ტაძრის კუთხეში მშვიდად,

არ იგალობებს ჩვენთვის არც ანგელოსთა დასი….

მომენდეთ, გულით ვამბობ-მე დიდ მადლობას გიხდით

გრძნობისთვის, რომ გაწვალებთ და თქვენც ვერაფერს მიხვდით,

ახლა რომ მშვიდად მძინავს და აღარ მტანჯავს ფიქრი,

რომ ვერასოდეს შევხვდით ღამის ქუჩებში მარტო,

რომ მთვარის შუქზე კოცნას თვენსას მე აღარ ვნატრობ,

რომ არ იწყება ათვლა დილით ამოსულ მზეზე,

რომ არ გავრეკე ბოლოს….თქვენც არ გაგიჟდით ჩემზე….”