“მივმართეთ თურქეთს და აზერბაიჯანს, მათ აუხსნან ქართველ მეზობლებს 3+3 ფორმატთან მიერთების სარგებელი” – ლავროვი

რუსეთის საგარეო საქმეთა მინისტრ სერგეი ლავროვი, 3+3 ფორმატზე საუბრისას, ამბობს:

„3+3 ფორმატის იდეას ჩვენ აქტიურად დავუჭირეთ მხარი, როდესაც პირველად ახსენა პრეზიდენტმა ალიევმა, შემდეგ კი — პრეზიდენტმა ერდოღანმა. ჩვენ მაშინვე დავინახეთ ამ ინიციატივის ძალიან კარგი, გამაერთიანებელი პოტენციალი. პირველივე დღიდან და მოსკოვში გამართული შეხვედრის მომზადებისას ვემხრობოდით, რომ ქართველი კოლეგები ასევე ჩართული ყოფილიყვნენ პროცესში, გამომდინარე იქიდან, რომ რაც მეტია ურთიერთობის პოტენციალი, უკეთესია არსებული პრობლემების მოსაგვარებლად.

მაგრამ 3+3 ფორმატში დაწყებული პროცესები, ჩემი აზრით, გაცილებით მნიშვნელოვანია, რადგან ამ ფორმატში მთელი რეგიონის განვითარების პერსპექტივა განიხილება. ახლა, როცა მიღწეულია სამშვიდობო შეთანხმებები [ყარაბაღში] გასული წლის საომარი მოქმედებების შემდეგ, იწყება სავაჭრო-ეკონომიკური კავშირების აღდგენა და  რეგიონში არსებული მარშრუტების განბლოკვა, ეს ხსნის შესაძლებლობებს, რომლებშიც დაინტერესბული არიან თურქეთიც, რუსეთიც, ირანიც და, დარწმუნებული ვარ, საქართველოც. მე მგონია, რომ მათ ინტერესშია, შემოუერთდნენ ამ ფორმატს წინაპირობების გარეშე. შეიძლება მოლაპარაკება, რომ ამ ფორმატში განიხილება მხოლოდ ის თემები, რომლებიც ყველა მონაწილის ინტერესშია.

რამდენადაც საქართველოსთან დიპლომატიური ურთიერთობები გაწყვეტილია, ჩვენ ნაკლები შესაძლებლობა გვაქვს, მათ ამ ურთიერთთანამშრომლობის ფორმის უპირატესობა ავუხსნათ. ჩვენ მივმართეთ თურქ და აზერბაიჯანელ მეგობრებს თხოვნით, რომ მათ აუხსნან ქართველ მეზობლებს 3+3 ფორმატთან მიერთების სარგებელი მათთვის, როგორც ყველა ჩვენგანისთვის. სომხეთსაც შეუძლია დახმარება. ასეთი მონაწილეობა მათ არაფერს დაავალდებულებს პოლიტიკური პოზიციების თვალსაზრისით.”

3+3 რეგიონული თანამშრომლობის ფორმატის იდეა ყარაბაღის მეორე ომის შემდეგ გაჩნდა და გულისხმობს სამი კავკასიური ქვეყნის (საქართველოს, აზერბაიჯანისა და სომხეთის) და სამი რეგიონული მოთამაშის (რუსეთის ფედერაციის, თურქეთისა და ირანის ისლამური რესპუბლიკის) სავაჭრო-ეკონომიკურ თანამშრომლობასა და ურთიერთობების გაღრმავებას.

„3+3 ფორმატის“ პირველი შეხვედრა მოსკოვში საქართველოს გარეშე გაიმართა და თბილისის პოზიციის მიუხედავად, მოსკოვში მხარეების შეხვედრისას ქართული დროშა მაინც გამოიყენეს.